Jowai, Ïaïong 18: Ka Jaiñtia Hills Development Society (JHDS) kaba pynïaid ïa ka FARM Northeast Project mynta ka sngi ka la plie paidbah ïa ka bynta basaw jong ka project (Phase-IV) ka ban pyntreikam ha kine ki lai snem ban wan ha ki 12 tylli ki shnong kiba hap hapoh ka Thadlaskeiñ bad Laskeiñ Block.
Ïa kane ka project la plie paidbah da u BDO ka Thadlaskeiñ Block u ma B. Sungoh ha ryngkat ka jingïadonlang ka Agriculture Development Officer Laskeiñ Block ka Kong R. Lamare, U AGM ka NABARD u Bah Grevile Kharlukhi, ka Dr. RM Lamare MBBS, u Director ka JHDS u Fr. Manbha Pakem, U Sir. Garhard Albert President KHUBLEI Germany bad kiwei de ki heh sorkar.
Kum ban shu pynkynmaw ïa kane ka FARM Northeast Project la sdang ban pyntreikam naduh ka snem 2013 ha ki bun tylli ki shnong ha rilum Jaiñtia. Ha kine ki 9 snem ba la lietnoh kane ka project ka la ai jingmyntoi shibun ïa ki nongrep khamtam ha ka rukom rep tynrai (organic farming), ki jingpynkhlaiñ ïa ka rukom treikam ki Dorbar Shnong, ki jing pynkhie im bad pynneh pynsah ïa ki dawai kymbat, ka jingrep krai, ka jingpynkhlaiñ ïa ka ïew ka hat bad kiwei de ki jingai jinghikai ba har rukom.
Ha kane ka bynta ka basaw (Phase-IV) kane ka project ka don ka jingthmu ban pynïar shuh shuh ïa ka jingrep krai, ban pynmih shuh shuh shibun ki mar-rep katkum ka jingdonkam, ban ban pynneh pynsah ïa ka mei mariang da kaba pynïar ïa ki jingthung dieng (mass plantation) bad kiwei de ki jingai jinghikai.
Haba ai jingkren, U BDO ka Thadlaskeiñ Block u la ai ka jingïaroh ïa ka JHDS kaba la shim ïa kane ka sienjam ban kyntiew ïa ka ïoh ka kot ki nongrep ha kine ki 12 shnong. Shuh shuh u la pynpaw ruh ïa ka jingkloi ban ai jingkyrshan bad ïatreilang lynba ki lad jingïarap kiba ka Block office ka don.
Ha kane ka sngi la ïoh ruh ïa ka jingbatai halor ki jingmyntoi jong u Krai ha ka jingkoit jingkhiah ki briew ïa kaba la ai da ka Dr. R.M. Lamare, Govt. Doctor Retd bad ka jingdonkam ban pynneh pynsah ïa ka jingsboh ka khyndew ïa kaba la ai da ka Kong. R. Lamare ADO Thadlaskieñ Block.
Ban pynkhraw shuh shuh ïa kane ka sngi, la ïoh ruh ïa ka jingsahkhi (testimonial) na ki nongrep krai ka Shnong Samanong ha ryngkat ki jingrwai bad ruh ka jingshad na ki khynnah skul ka Shnong Ingkar.
