Shillong, Naiwieng 20 : U Bah Wanseng Jyrwa, uba long u Working president ka United Democratic Party (UDP), Mawlai Circle bad jong ka Mawlai Constituency Progressive Forum (MCPF) u la plie pyrda ïa ka football tournament ba la pyniaid da ka Umrynjah Sports and Cultural Club myn ha ka sngi Saitjain ka 18 tarik u Naiwieng, 2023.
Ha kane ka jingplie pyrda la ïa don ryngkat u president ka Umrynjah S&CC u bah O. Thabah, u secretary bah Leading Kharshiiing, u rangbah shnong Umrynjah bad kiwei kiwei.
U Bah Wanseng haba ai jingkren kum u kongsan u la pynpaw ba kum u nongïalam u don ka jingkitkhlieh na ka bynta ki khun samla kumta u sngew ba ki donkam ban khring ïa ki khun samla sha ka jingïalehkai khnang ba kin lait na kiba bun ki jingsniew kiba la ktah ïa ka imlang sahlang ha kine ki sngi kiba mynta.
Ha kane ka sngi la pyrda da ka jingïakhun hapdeng ka Arka SC bad ka Umsaitphrah SC, ia kaba ka Arka SC ka la jop da Ar la Nod (2-0) pyrshah ïa ka Umsaitphrah.
Ha kane ka lympung ïakhun ki la don baroh 16 tylli ki kynhun kiba la poi ban ïa shim bynta.
