Plie u Bah Renikton ïa ka jaka ai jinghikai suhjaiñ ne ka “Jev’s Wann Fashion & Designer” ha Mawkyrwat

Mawkyrwat, ‘Nailur, 22: U bah Renikton Lyngdoh Tongkhar u nongmihkhmat jong ka Mawkyrwat Constituency bad Myntri jong ka tnad Umbah Umdih jong ka Sorkar Meghalaya uba long kum u kongsan u la ïoh ban plie paidbah ïa kawei na ki jaka ai jinghikai suhjaiñ jong ka kong Jevellin Wanniang kaba la ai kyrteng “Jev’s Wann Fashion & Designer” kaba don ha Mawkyrwat, South West Khasi Hills District.
Haba kren kum u kongsan, u bah Renikton Lyngdoh Tongkhar, u la ai ka jingïaroh na ka bynta ka jinglah jong ka kong Jevellin Wanniang ha kaba ka la lah ban leh ïa kum kane ka kam kaba khraw ym tang ka jingmyntoi ïa ka shimet hynrei kaba long ruh kum kawei na ki bynta ban ai jingshakri de ïa kiwei pat ki para samla jong ka dong ka thaiñ kiba don ka jingthmu ban ïeng ha la ki jong ki kjat lyngba ka kam suh bad thaiñ jaiñ. “Ban wad tang da ki kam sorkar ha kum kine ki sngi ka la long kaba eh than namar ka kam ka duna hynrei ki nongwad kam pat ki la nang bun”, ong u bah Renik. Namarkata, ka la dei ka por ba kum ki khun samla jong ka dong ka thaiñ kin don ban pyrkhat thymmai da kaba kin sdang ban seng noh da ki kam la jong la ka long kano kano ka bynta kaba ki ki sngewbit khnang ba kin lah ban pynbiang ïa ki jingdonkam la ka long ha ïing ha sem ne wat ïa lade ruh.
U bah Renikton haba bynrap ïa ka jingkren, u la ai jingmut ruh na ka bynta ki paidbah ba kam dei shuh ka por ban shu ïa peit lorni ïa kiei kiei kum ha ka riam ka beit jong kiwei pat hynrei ki dei ban pyrkhat thymmai noh kumno ban kyntiew ïa ki kam lyngba ki jinglap kiba thymmai ba kum ki khun samla ki lap bad ban leh ïa kata ka dei lyngba ka jingwan jong ki sha ki jaka shah hikai ne ki training centre ban long kiba tbit shuh ha ka kam suh bad thaiñ jaiñ. Ha kajuh kapor ula ai jingmut ruh ïa ki samla ki ban sa leit ha ka jingshah hikai ba kim dei ban shu leit tang ban pynlut kai ïa ka por ka bor jong ki hynrei ki dei ban leit da ka jingthmu ban long kiei re kiei hadien habud namar lada leit da kaba shu bud tynneng ïa ka jingleh kiwei kam ju poi sha ka thong. U la ai jingmut ruh ba kum ki samla ki dei ba don ka thong ha ryngkat ka jingtrei shitom bad kut jingmut bad leh ïa kiei kiei kiba ai ka jingmyntoi.
Haba kren ha kaba ïa dei bad ka “Jev’s Wann Fashion & Designer” ba la sdang da ka kong Jevellin Wanniang u la ai ka jingïaroh namar na ka jingsdang kaba rit ka la lah ban ïoh haduh ar tylli ki jaka ai jinghikai. Namarkata, ka long kaba dei ba lyngba kane ka jingïoh ban plie sa ïa kawei pat ka jaka ai jinghikai kan sa long ka jingkyrkhu kaba khraw ïa ka dong ka thaiñ baroh kawei. “Nga don ka jingkyrmen ruh ba shisien ka sngi ynsa mih ki jaiñ phong kiba don ka jingthoh ‘La shna ha Mawkyrwat ne ‘Made in Mawkyrwat”, u la ong bad kane kan dei ka jingphohsniew jong u lyngba ka jingplie ïa kane ka Jev’s Wann Training Centre.
Khyndiat shaphang ka kong Jevellin Wanniang kaba dei ka trai ne nongseng ïa ka “Jev’s Wann Fashion and Designer”. Ka kong Jevellin Wanniang kaba dei na ka shnong Mawlangwir, South West Khasi Hills District ka la pyndep ïa ka jingshah hikai ha ka Fashion and Designer ha u snem 2015 na ka Information Technology in Fashion ha National Institute of Fashion (NIFT) ha u snem 2014 – ’15 ha Kolkata ba la kyrshan da ka India’s Ministry of Textiles.
Ha u snem 2016 hadien ba ka la pyndep, ka la ïoh ban plie ïa kawei ka dukan suhjaiñ ha ïew Mawkyrwat bad lyngba ka jingïoh ban plie ïa kane ka dukan, dei ha ka 30 tarik u Risaw, 2018 ka la ïoh ban ai kyrteng ïa ka dukan jong ka ka “Jev’s Wann Fashion Designer Tailoring & Embroidery” da ka jingthmu ba kan long ruh kum kawei na ki lad ban plie lad plie lynti na ka bynta ki samla ki bym donkam donjam kiba kwah ban wan shah hikai khnang ba ma ki kin lah ban kyrshan da lade lyngba kane ka kam bad kin ïoh ban pyndonkam ïa kawei ba ki ki la ïoh jinghikai.
Shuh shuh la ong ruh, ba ka kong Jevellin Wanniang ka la dep ruh ban register hapoh ka ophis jong ka District Commerce & Industries Centre’s (DCIC), South West Khasi Hills District ha kaba lyngba kane ka la nang ïoh shibun ki nongwan shah hikai lyngba ka jingïarap jong kane ka ophis treikam.
“Nyngkong eh nga la sdang ban ai jinghikai shwa ïa kiba ha ïing ha sem lyngba ki kor kiba i mei ieid i don”, ïathuh ka kong Jevellin Wanniang bad lyngba ka jingïaishah bad minot thop ha la ka kam ka kong Jevellin mynta ka la ïoh ban buh ruh ki katto katne ngut ki nongïarap ha ka suh ka thaiñ bad da ka jingïoh ban plie biang sa kane kawei ka shlem ai jinghikai suhjaiñ kaba hikai ei ne free training kan sa long ka jingkyrkhu shuh shuh na ka bynta ki samla kiba don ka jingthrang ban pyntbit ha kane ka kam suhjaiñ.
Kiwei pat ki nongkren ha kane ka sngi ki long ka kong J. Kharpuri, Additional Deputy Commissioner, South West Khasi Hills District kaba dei ruh ka Incharge Skill Development Branch, u bah M. War, General Manager, District Commerce & Industries Centre’s, South West Khasi Hills District.
Ha kane ka sngi la ïoh ka jingpyni lyngba ka ‘Projector Presentation’ ïa ki katto katne ki bynta jong ka jingïaid lynti ka kong Jevellin Wanniang lyngba ka dukan “Jev’s Wann Fashion Designer Tailoring & Embroidery”.