Leit tynruh u Bah K.P.Pangñiang ïa ka PWD halor ka surok PMGSY

0

Nongstoiñ, Nailur 21: Ka jingpynbha bad siang rong ïa ka surok Tynghor-Athiabari kaba jngai kumba 16 kilomitar lyngba ka Pradhan Mantri Gramsadak Yojana (PMGSY) kaba 16 kilomitar, ka la ïaid shaid shaid naduh kine ki bnai ba la dep ha kaba la sdang ban sïang maw naduh Aradonga.
Kum ban pynkynmaw ba ïa katei ka surok la khot tender haduh lai sien lai wat, hynrei na ka daw jong ka jingrit jong ka jingmang pisa ym don ba thep satia. Pynban kham hadien pat uwei u kontraktor u la shimti ban pyntrei ïa katei ka surok bad u la dep kumba lai kilomitar. Tangba mar shu sdang ka lyiur katei ka surok ka la pra bad jot rathai, namar ba ka jingsiang rong ka dei kaba la leh da ka rukom shna kaba thymmai kaba la shu khleh ïa ka khyndew bad ka kynja dawai kaba la tip kum ka ANT khlem da pyndon kam mawria.
Kumta halor katei ka jingbym neh jong ka surok mynta ka sngi balang, u bah K.P.Pangñiang ryngkat u bah Nasar Syiem Jahnoh Sirdar ka hima Jyrngam ba la synran lang da ki katto katne ngut ki rangbah shnong, ki la leit ban ïakynduh ïa u Superintendent Engineer na ka PWD Western circle, ban kynrpad ïa u ba un thaw lad ban pynkylla noh ïa ka rukom pyntrei la ka dei ban siang noh da u mawria kumba leh ïa kiwei kiwei ki surok, ne lada pyntrei da katei ka juh ka rukom kaba thymmai ruh, un sngewbha ban pyntip sha ka sorkar ba ka don kam ban pyntrei da ki buit kiba kham bha khnang ba ka surok kan neh.
Ha katei ka jingleit ïakynduh ïa utei u heh ka PWD, ki la aiti ruh ïa ka jingthoh kaba la ïasoi lang da baroh ki nongsynshar shnong katei ka thaiñ, khnang ba utei u Ophisar un pyntip sha ka sorkar ba kan leh ïa kaba don kam.
U Bah K.P. Pangniang, u la ong ba katei ka surok kaba sdang naduh Nongkhlaiñ ka pynïasoh bad ka surok Riangdo-Athiabari, ka dei ruh ka surok kaba ki paitbah katei ka thaiñ ki donkam haduh katta katta ban leit sha ïew Hahim, namar ba ka dei ka ïew kaba ki pynïaid ïa ki mar rep jong ki kum u sying, u kwai, ka kait, ki soh, ki jhur ki jep bad ki wei kiwei.
Ha kajuh ka por u bah Pangñiang u la ong ba kumba ka long mynta, na ka liang ki paitbah jong katei ka thaiñ ki la kwah ba la kumno kumno ka jingpyntrei ïa katei ka surok, kan long kaba kham pynsted bad la kumno kumno hapoh kane ka snem, la dei ban pyndep noh khnang ba ki paitbah kin lait na ki jingeh ha ka leit ka wan ka kit ka bah.

Leave A Reply

Your email address will not be published.