Ka ishu ktem khalai lane ka casino ka la khluit bha ha ka jylla namar jan baroh ki sengbhalang lane ki nongïalam shnong ki la khih tyngeh ban pyrshah ïa ka jingthmu jong ka sorkar ban ïaid shakhmat ïa katei ka ktem khalai. Kumba la sakhi ha kane ka sngi Palei bun tylli ki seng ki la mih paidbah ban pynpaw ïa ka jingpyrshah kaba jur watla na ka liang ka sorkar ka la dep ban pynpaw ba kan pynsangeh noh ïa katei ka ktem khalai.
Lah ban kdew hangne ba watla u Symbud Myntri Rangbah ka jylla Bah Prestone Tynsong u la dep pynpaw ba ki la dep buh syndon da u full stop uba heh haba ïadei bad ka Casino hynrei na ka liang ki sengbhalang bapher bapher kim shym la pdiang ne ngeit pynban ki la hiar paidbah ha kane ka sngi Palei sha katei ka jaka ba thmu ban pynieng ïa ka.
Na ka liang ka HYC ka la pynpaw ba kim lah satia ban pdiang kumba la kam da u Myntri Rangbah ka Jylla, Conrad K Sangma ba ka sorkar kan ym shah ïa ki trai jylla ban leit rung sha ki jaka ïa khalai da kaba ong ba kam don kano kano ka kyndon ka ban ai bor lane ban buh ïa ki bor sorkar kum ki pulit ha kine ki jaka na ka bynta kane. Ka seng ka pynpaw ruh ba watla ki trai jylla ki lah ban shah khang ha ki kam khalai hynrei ki lah pat ban leh ïa kiwei ki kam sniew la ka long naduh u drok bad kiwei. Kumta dei halor kitei ki nongrim ba ka seng ka dawa ba dei ban Repeal ne pyndam noh ïa ka Act bad Rules mardor, nangta ban weng noh ïa u Chairman bad ki dkhot ka Gaming Commission bad kumjuh ruh ban weng noh mardor ïa ki 3 tylli ki License kiba lah ai da ka Sorkar.
Kane ka sienjam ba la shim da ki seng lehse kan dei ka kabu ksiar kaba paka tam eh ruh ïa ka sorkar ban pynshai ïa ki kyndon kiba la buh na ka bynta katei ka ktem khalai namar da kaba leh kumta lehse ki nongshong shnong kin ïoh jingshai shuh shuh kiei ki jingma lane ki jingsyier kiba lah ban ktah kylla ïa ki nongshong shnong hadien habud ynda katei ka ktem ka la ïaid iew bha.
Ym dei tang ka casino kaba ktah ïa ka burom ka ijot jong ka jylla khamtam eh lada ïa kren ïa ka khalai, mynta ka la dei ruh ka pali jong ki seng bad ki nongïalam shnong ban peit ruh ba kiwei ki jait kam kiba syriem ïa ka kam khalai kin ym ïoh ban treikam laitluid ha ka jylla. Kadei ruh ka kamram jong ki ban peit ba ka jingpynlong ïa ki fete kiba man ka por ha ki shnong ki thaw lane wat ki jingïakob khwai dohkha kaba man ka por ka ktah ym tang ïa ka kamai kajih hynrei wat ïa ka bylla ka sngi jong ki nongshong shnong. Ka jingpynlong fete man ka por ha ki shnong ki thaw ym tang ba ka ktah ïa ka kamai kajih jong ki nongshong shnong hynrei ka ïalam bakla wat ïa ki khynnah kiba dang khie dang san kiba dang hap ban pynleit jingmut ha ki jingpule lane ha ka bylla ka sngi.
Kadei ka kamram jong ka sorkar ban peit ba ym dei eh tang ka casino ba kan pyndam hynrei ban teh lakam ïa bun ki kam khalai da kaba buh hakhmat eh ïa ka jingpynlong fete pathar bad wat ka jingdie pathar ïa ka kyiad ha ki shnong ki thaw khlem ïoh jingbit. Baroh ki jingteh lakam kin seisoh lada ka don ka jingïatrei lang hapdeng ki nongïalam shnong bad ki kynhun seng.
