Plie u Bah Prestone Tynsong ïaka iing Dorbar ka shnong Nongkhrah, yn pynthikna ki kam pynroi sha ki shnong

Nongpoh, Rymphang 29: Hadien bun tylli ki snem ka jingap khmih lynti ban ioh noh ka iing Dorbar kaba paka, ka shnong Nongkhrah ha Ri-Bhoi mynta ka sngi kala ioh ban plie paidbah noh syndon ïaka iing Dorbar ba paka naka bynta ban pyntyllun ïaki kam shnong kam thaw.
Ïa katei ka ïing Dorbar la tei haka jinglut ba 10 lakh lyngba ka skhim SRWP haka por jong u Dr DD Lapang bad ka Grand In Aid naka tnad Urban lyngba ka Nongpoh Town Committee bala wan ban plie paidbah mynta ka sngi da u Bah Prestone Tynsong Symbud Myntri Rangbah ka jylla haka jingdonlang u Raja Brahma ADC ka Ri-Bhoi, S Langstieh District Urban Officer, BB Makdoh Chairman Synjuk ki Rangbah Shnong, Bah CB Syiem Adviser ka Nongpoh Town Committee, Bah Rayonald Kharkamni Secretary ka Nongpoh Town Committee bad kiwei kiwei ki riew rangbah ryngkat ki paidbah nongshong shnong ka shnong Nongkhrah.
Haba kren ha katei ka jingialang, naka liang ki nongïalam Shnong ki la ai ka jingkhublei kaba kyrpang ïaka sorkar kaba la sngap ïaka jingdonkam jong ka Shnong bad lyngba ka jing ïoh ban plie noh ïa kane ka ïing Dorbar kaba thymmai kan long ka jingkyrkhu ïaki nongshnong shnong ba kin dang lah ban pyntyllun shakhmat ïaki kam Shnong kam thaw.
U Bah Prestone Tynsong haba kren ha katei ka sngi u la pynpaw ka jingsngewkmen kaba khraw ba ka shnong Nongkhrah hadien bun tylli ki snem kala ioh noh ïaka iing Dorbar kaba paka ban ioh ban pyntyllun ïaki kam shnong kam thaw bad u la ong ruh kane ka jingïoh ban plie noh mynta ka sngi ïaka Ïing Dorbar ba thymmai ka long kum kawei na ki kam pynroi bad lyngba kane ka Ïing Dorbar ki nongïalam shnong kin ïoh ban saiñ dur ïaka shnong ka thaw.
U Bah Prestone u pynpaw ruh ka jingïaroh ïaka sorkar jylla kaba la lam khmat da u Myntri Rangbah la Jylla u Conrad Sangma, ba dei lyngba ka jingstad bad ka jingshemphang jong ki Myntri kiba don haka sorkar la lah ban wan rah shibun ki kam pynroi hapoh ka jylla baroh kawei bad ka sorkar kan pynthikna ba baroh ki shnong kin ioh ïaki kam pynroi.