Khliehriat rymphang 29: ka ophis jong u District Transport Officer, East Jaiñtia Hills District, ha ryngkat ka jingïatreilang bad ka bor district kumjuh ruh bad ka tnat ka koit ka khiah mynta ka sngi ka la pynlong ïa ka prokram National Road Safety Week 2024 ha Ladrymbai, kane ka prokram ka don ka ktien phira ““Be a Road Safety Hero”
Haba kren ha ka jingialang u Motor Vehicle Inspector, u bah H. Dkhar u la pynshai halor ki aiñ ñiah kali khnang ban dup lait na kano kano ka jingiatyngkhuh kali , u la ong ruh ba kane ka prokram ka dei ruh kum shibyntta ban ai jingpynshai ïa ki paidbah ha kaba ïadei bad ka jingshngaiñ ha ka leit ka wan namar hapoh ka jylla Meghalaya don tang ki surok rong ba ïaid kali ym don da kiwei pat na kata ka daw ki nongñiah kali ki dei ban sngewthuh bha ba ki dei ma ki kiba kit ïa ki mynsiem briew, ki dei ma ki ki ban hap ban don ïa ka jingkitkhlieh ïa ka jingim briew ym tang ïa ka jingim la jong hynrei ïa kiba shong kali ruh kumjuh.
U Sub-Inspector uba na ka tnat pulit, u bah E. Sohshang, u la pynpaw ka jingsngew khia halor ki jingjia aksident ne iatyngkhuh kali man la u snem kiba ka tnat pulit ka la ioh lum lyngba ki ejahar bad ong ba kane baroh ka dei manar ka jingbym shim khia ban bud ïa ki kyndon ñiah kali bad kiba pynkheiñ ïa ki aiñ ñiah kali, u kyntu ïa kiba ñiah kali khamtam eh ki samla kiba ñiah kali ba ki dei ban kiar na ki jingdih pynbuiad ha ka por ba ki ñiah kali ha kajuh ka por u kyntu ruh ïa kito kiba iaid da ka kjat ha lynti ne ha surok ba ki dei ban long phikir bha ban bud ïa ki kyndon ban lait na kano kano ka jingma, jingmynsaw ne ki jingjia ba sngewsih.
Kiba la ai jingkren ki kynthup ruh u Dr. D. Sayoo, u President, Local Taxi Association, East Jaintia Hills District, u bah T. Rymbai bad u President, Tourist Taxi Association (Lad Rymbai- Jowai), u bah S. Ryngkhlem.
