Nongstoiñ, Jymmang 29: Na ka bynta ban pynshlur ïa ki nongrep ba kin trei shitom na ka bynta ban kyntiew ïa ka ïoh ka kot jong ki, ka ophis jong ka Krishi Vigyan Kendra West Khasi Hills kaba don ha Nongshilong, mynta ka sngi palei ka 29 tarik Jymmang ka la pynlong ïa ka prokram ba kyrpang kaba la tip kum ka Viksit Krishi Sankalp Abhiyan.
Ïa katei ka prokram la pynlong ha ka hall jong ka ophis bad ka jingthmu jong ka prokram, kaba la wanrah da ka Ministry of Agriculture & Farmer Welfare jong ka sorkar pdeng, ka long ban khring bad wanrah ïa ki shi klur shiteng ki paitbah nongrep na ki 700 tylli ki district ha ka Ri lyngba ki 2000 tylli ki kynhun, kiba kynthup ia ki scientists jong ka ICAR bad Krishi Vigyan Kendras (KVKs) ha ryngkat ka tnat Agriculture jong ki Sorkar Jylla.
La plie ïa katei ka prokram da u bah Powell Sohkhlet MDC ka Parïong Mawthadraishan, u ba long ruh u EM u ba peit ïa ka Land & Revenue ha ka KHADC kum u kongsan, ha ryngkat ka jingïadonlang jong u bah W.Massar MCS, BDO ka Mawthadraishan C&RD Block kum u Symbud Kongsan.
Kiwei ki kynthup naduh ki Ophisar sorkar na ka Department jong ka Agriculture & Farmers’s Welfare (EWKH & WKH), Animal Husbandry & Veterinary Department (EWKH & WKH), Department of Fisheries (EWKH), DDM NABARD (WKH), Scientist jong ka Central Agricultural University.
Hadien ba la plie ïa katei ka prokram la pynlong ïa ka jingïalang ba lyngkot bad la ïoh ïa ka jingpynshai lyngkot sha ki nongrrep da u bah Powell Sohkhlet, u ba la ong ba ka rep ka riang ka dei kaba kongsan tam ha poh ka ri bad ki nongrep ki dei ki païa kiba khlaiñ na ka bynta ka ?oh ka kot.
U la kyntu ruh ïa ki nongrep ba ki dei ban wan sha District Council ban phah register ïa ki jaka rep jong ki, namar haba ka sorkar ka thmu ban ai jingïarap sha ki nongrep, ka donkam ïa ki jingpynshisha la u nongrep u ba ka mut ban ai jingïarap u/ka don ne em ïa ka jaka rep.
Ha kane ka sngi la sam ruh ïa ki symbai dohkha sha ki nongrep kiba na Eastern West bad West Khasi Hills, kiba la don kyrteng ha ka thup ban ïoh ïa ki jingïarap. Nalorkata kum shi bynta ban pynshai ïa ki nongrep, la sdang ruh ïa ka prokram ba kyrpang ban rung sha ki shnong na ka bynta ban pynshai sha ki nongrep, ïa kaba la phiah ha ki lai kynhun bad kawei kawei ka kynhun ka hap ban pyndep lai tylli ki shnong ha ka shi sngi.
Kitei ki lai kynhun ki la sdang naduh mynta ka sngi bad ki la sdang ban rung sha kine ki shnong. Ka kynhun ba nyngkong ka hap ban pyndep ïa ka shnong Sylleimynteng, Umjei bad Mawroh. Ka ba ar ha Nongshillong, Mawkohngei bad Umkrem. Kaba lai ha Wahrinong, Dombah bad Domkseh.
Yn pynlong ruh ïa katei ka Campaign ha ki 108 tylli ki shnong Eastern West bad West Khasi Hills Districts da ki 9 tylli ki kynhun, kiba kynthup lang ruh ia ki Scientists na ICAR, Central Agricultural University bad Krishi Vigyan Kendra (KVK), Department of Agriculture & Farmers’s Welfare, Animal Husbandry & Veterinary Department, Department of Fisheries, bank (PNB) lem bad ki dkhot jong ki FPO bad ki nongrep kiba lah paw (Progressive farmers).
