Hadien ka ding baklang sah umdum ka shnong Lumshnong halor ka jingjia ha Star Cement

Shillong, Jymmang 29 : Hadien ka jingjia jong ka jingïatyngkhuh kali hapdeng ka trok jongka kompani Star Cement bad kawei kali Bolero Pick -up trok hajan ka shnong Wahiajer, ha ka surok bah N.H -6 la jia ka jingkulmar kaba jur ha phyllaw jongka Star Cement ha ka shnong Lumshnong, East Jaintia Hills kaba la wanrah ka jingiap jong u nongñiah jongka Pick Up namar ka jingshah tylliat ha ka trok. Kane ka jingkhlang jong ka ding ha katei ka jaka da ka jingshah thang jong 26 tylli ki trok jongka Star Cement ka la buh ïa ka shnong Lumshnong ha ka umdum kaba khraw namar ka la ktah ïa ka shongsuk shongsaiñ kaba ju ïai bteng ban don ha katei ka shnong naduh ba wan seng ki kompani dewbilat ha katei ka thaiñ.
Ka jingjia ka la jia ha ka miet Sngi U Blei 18 tarik Jymmang 2025 hadien ka jingïatyngkhuh ka trok jong ka Star Cement bad ka Pick-Up trok hajan ka shnong Wahiajer, NH 6, East Jaintia Hills District. Hadien katei ka jingjia u nongñiah jong ka trok ka kompeni Star Cement u Sailangmi Dkhar uba na Khliehtyrshi u la phet krad namar u tieng ïoh shah shoh shah bom. U nongñiah ka Bolero Pick Up Camper uba kyrteng u Sniawbhalang Suchiang lem bad ki paralok jongu ki la beh thong ïa katei ka trok shaduh phyllaw jongka Star Cement. Haba la poi ha katei ka jaka la ïathuh ba u Sniangbhalang uba dei u trai shnong u la kiew ha katei ka trok lem bad ki paralok jongu bad ki la shoh ïa u Sailangmi Dkhar bad byrngem byrsit ban pyniap ruh ïa u. Ha kum katei ka jingjia u nongñiah katei ka trok Star Cement u la ñiah ïa ka trok shakhmat namar u pyrshang ban phet hynrei ka trok ka la ïoh ïuh ïa une u nongñiah ka Pick up uba la khlad noh hashen.
Kane ka jingjia ka la saphriang khubor sted kylleng ki shnong ba marjan bad tang hadien katto katne por la poi ki briew sha katei ka phyllaw kiba la ïalum ym duna ïa ka 300 ngut ei ei. Kine ki la rah da ki tiar ki tar pynmynsaw, ki dieng, ki maw bad sdang ban pynkulmar da kaba pynjulor shwa ïa ki CCTV Camera, shoh ïa u nongap pahara bad khanglad ïa ki pulit ban pynkit ïa ka metiap sha Civil Hospital Khliehriat . Ha kum katei ka por la wiang ding ruh haduh 26 tylli ki trok jongka star cement. Haba ka kynhun bad kali pynlip ding jongka star cement ka pyrshang ban wan pynlip ïa ka ding kitei ki briew ki la khanglad bad thmu ban thang sa ïa katei ka kali pynlip ding. Ki pulit jongka Lumshnong kiba pyrshang ban ïada bad khanglad ïa katei ka jingjia ruh ki la shah ktah kti ha kitei ki briew. Dei tad hadien ba la wan poi ki bor pulit na Khliehriat ba sa lah ban pynjai jai ïa ka jingkulmar. Hadien kane la ïoh ruh ban pynkit ïa ka metiap sha Civil Hospital Khliehriat ban pyndep ïa ka post mortem. Mynta ka jingtohkit ka dang ïaid shakhmat.
Ka kynhun ki nongthoh khubor kaba la hiar sha katei ka jaka ha ka 28 tarik Jymmang ki la sakhi da lade ïa kitei ki trok kiba la shah wiangding kiba don ha ki jaka pynïeng trok jong ka kompeni star cement. Kane ka jingjia ka lah ban dei ka jingshim kabu jong kitei ki nongkyrni dih ïa ki jingdih pynbuaid namar ki briew ka kompani ki la ïoh bat la bun bun sien ïa ki briew kiba tuh ïa ki tiar ki tar jong ki kor ki bor pynmih dewbilat ban ïoh die tuh bad ïoh thied ïa ki jingdih ba pynbuaid jong ki.
Uwei na ki nongniah trok ka star cement ula ong “ Ngi kit jingkit kat ïa kiba don kiba siew tulop ïa ngi, hynrei mynta ka buh ïa ngi ha ka jingsyier ban kit ïa ka dewbilat jongka star cement namar lada jia ba shah pynthut ha ka ïaid ka ïeng shano ngin phet iap”. Uwei pat u ong “ Lada kane ka ïai bteng kumne da ei ngin bsa ïa ki khun ki kti jong ngi. Hooid ngi sngewsynei ïa ka jingjia bad jingiap jong utei u nongñiah Bolero Pick Up tangba kam dei ka jingleh khnang hynrei hapdeng ka jingkulmar ha ka jingpyrshang jong u nongñiah ban ñiah ïa ka trok shakhmat la kum ïoh ïuh ïa u ha kaba u la khlad hashen.Nalor kata ka jingthang ïa ki trok ka kompani ka dei tang ka kput namar ym dei ka kompani ba leh ka dei ka jingïatyngkhuh jong kawei ka trok bad kawei ka trok pick up bad ha ka jingshisha kam dei ban poi shaduh une u pud”.
Ki nongtrei ka kompani star cement ki bym treh ban pynpaw kyrteng ki shu pynpaw ïa ka jingsngew diaw kaba jur halor kane ka jingjia. “ Ngi la don hangne naduh ba sdang bad ngi la pyrshang ruh katba lah ban kyntiew ïa ka shnong hynrei lada ym don ka jingshngaiñ, lehse kan poi ka por ba ka kompani kan hap ban khang noh khamtam mynta ba ka kompani ka la dep ïasoi ïa ka MoU bad kawei ka jylla ba marjan ban sdang ka jingpynmih dewbilat noh na katei ka jylla ruh.
U la ong “ Ngi la siew lut naduh ka DMF, GST sha ka sorkar bad kaba ngi kwah ka long tang ban ïoh ia ka jingshngaiñ. Ka shnong Lumshnong ka la kiew bha namar ka jingdon ka kompani namar kumba 4000 ngut ki nongshong shnong ha kane ka shnong kaba don kumba 700 tylli ki longïing ki la ioh jingmyntoi bha ha kiba bun ki liang”.
Ka District Mineral Foundation ka dei ka fund kaba la siew pisa da ki kompani ban ïarap ïa kito ki briew kiba sah ha kito ki jaka ba tih par mawshun ne jaka ba seng ïa ki kompani.
Na ka liang u Deputy Commissioner (DC) ka East Jaintia Hills u Shivansh Awasti bad u Superintendent of Police (SP) East Jaintia Hills u Giri Prasad Raju ki la ïathuh ba ki la shim khia bha halor kane ka jingjia bad ki dang phah tohkit bniah ban lap ïa kiba donkti baroh.
U SP u la ïathuh ba ha ka jingtohkit la sdang ban lap ksai ïa ki briew kiba ïadonkti ha ka jingkulmar bad shen yn sa ïoh ban kem ïa ki. U la ïathuh ruh kumba long mynta ym duna ïa ka 15-20 ngut ki briew kiba la kyrni bha ha ka jingdih drok tangba ka aiñ ka khang ïa ki pulit ruh ban kem bad set along ïa ki da ki bun bun por namar ïa kum kitei ki briew donkam ban buh sha ka jaka ai jingsumar ne ki Rehab Centre.
U DC u Awathi u la ong hooid ka district kam da pahuh than ha ka liang ka pisa tyngka hynrei wat la katta ruh kum ki bor pynïaid district kin trei shitom da ka jingïatrei lang bad ki paid nongshong shnong namar kumba long mynta ruh ki paidbah ki wan shakhmat ban ïatrei lang ha kino kino ki kam. U la ïathuh ba ka jingpynkhreh ban plie noh ia ka Rehab Centre ruh ka dang ïaid shakhmat.
Hooid na ka liang ka Star Cement ka la pyrshang ban ïarap ïa katto katne na kiba kyrni dih drok ban leit buh sha ki rehab centre sha Silchar hynrei ki kmie ki kpa ki leit sei noh ïa ki da kaba ong ba kam biang ka bam ne ym ïasngewthuh ka ktien ka tylliej.
Ki paid nongshong shnong jongka Lumshnong kim kwah ban kren ei ei bad wat u Rangbah Shnong ruh um don kumta ym lah ban ia kynduh ïa u da ki nongthoh khubor.
Na ka liang ki bor pynïaid district ki pynpaw ka jingsngewkhia jur ïa ka jingjyllei ki nongdih drok ha ka thaiñ bad lada kum kine ki jingjia ki dang ïai jia kaba ma ïoh ka ïoh ka kot jongka thaiñ ruh kan hiar.
Kat haduh mynta ki bor pahara ki dang pahara pyrkhing bha ha phyllaw ka star cement. Kaba sah mynta ka long ba ki bor synshar shnong kin ïatrei lang bad ka kompani ban wanrah biang ka jingïadei hapdeng ki paid nongshong shnong bad ka kompani kumba ju long baroh shi katta.