Plie u Bah Pius ïa ka ïing skul ka ‘Khonjoy A Govt. L. P. School ba la maramot
Ïoh ka Ranikor Constituency ban pynbha 7 tylli ki skul Sorkar

Mawkyrwat, Risaw 14: U bah Pius Marweiñ uba long u MLA/MDC jong ka Ranikor Constituency kum u kongsan ha ka 13 tarik u Risaw, 2022 u la ïoh ban plie ïa ka ïing skul jong ka Khonjoy A Government Lower Primary School kaba ka ïing skul ba la pynthymmai ne repair ha ka jinglut kaba T. 37/- lak tyngka ha ryngkat ka jingïadonlang jong u bah D.G. Nongsiej, Sub Divisional School Education Officer (SDSEO), South West Khasi Hills District kum u symbud kongsan.
Lah ban kdew ba ka jingplie ïa kane ka ïing skul ne ka shlem ai jinghikai kam dei kaba dang plie thymmai hynrei ka dei namar ka jingïoh ki lad jingïarap ban pynbna na kaba rim sha kaba thymmai ba la ïoh ka jingmang pisa na ka sorkar kaba kot haduh T. 37/- lak tyngka. La ong ruh ba ka jingmang ka dei ban shna bad tap da ka tin hynrei na ka liang u nongpyntrei pat da ka jingshimkhia jong u u la ïoh pynban tap syndon da ka dewbilat khnang ba kan long ka jingïarap na ka bynta ki khynnah skul kiba wan pule bad ban kan nym don shuh ka jingthmu haba shim ki jinghikai ha ka por ba wan u slap ne ka lyer.
Haba kren ha ka jingïalang u bah Pius Marweiñ uba long u MLA/MDC jong ka Ranikor Constituency u la pynpaw ka jingsngewkmen ban ïoh ka lad ban plie noh ïa ka jingtei jong ka ïing skul kaba thymmai ha Khonjoy A ha kaba ki khynnah skul kin ïoh ban pyndonkam ban leit ban wad ka jingstad lyngba ki jingshah hikai kiba bun jait na ki nonghikai. Hooid! ka la don teng ka ïing skul kaba rim, hynrei na ki daw ba kata ka jingtei ka la jot bad ba ki khynnah skul kim shngaiñ shuh ban shong kumta dei da ka jingshimkhia jong u lyngba ka jingpynsngap jong ki bor sorkar ba ki la mang pisa kyrpang ban pynbha ïa ka Khonjoy A Government Lower Primary School khnang ba ki khynnah skul kin nym don shuh ka jingthut ha ka pule dangle.
“Ka jingmang na ka bynta ban pynbha ne repair ïa kane ka Khonjoy A Government Lower Primary School ka long haduh T. 37/- lak tyngka, bad ka jingmang la dep ban pruit dak ban tap da ki tin, hynrei da ka jingshimkhia jong u nongpyntrei la pynshna bad tap syndon da ka dewbilat”, ïathuh u bah Pius. Namarkata, u la pynpaw ka jingaikhublei kaba kyrpang na ka bynta u nongpyntrei uba la leh kat ïa kata ka kam kaba bha uba la pynlut tam ïa kaei kaba la mang ruh.
Shuh shuh u la ïathuh ba lyngba ka jingshimkhia jong ka sorkar MDA haduh mynta la dep ban mang lypa ban pynbha ne repair ïa ki Government School hapoh ka Jylla, ha kaba ka Ranikor Constituency ka la ïoh haduh 7 tylli ki skul katba ka Mawkyrwat Constituency pat 5 tylli. Kumta u la ai mynsiem da kaba ong ba ka pule ka puthi ha kine ki sngi ka long kaba kongsan tam naduh u khynnah haduh u rangbah ruh, kumta kum ki kmie ki kpa ki dei ban pynshlur ïa ki hep kiba rit ba katba dang biang ka por dei ban pynlut ha ki jingpule ym ha kiei kiei ki bym myntoi.
Ha kane ka sngi ïa ka jingïalang la pynïaid da u bah I.M. Marak, Chairman jong ka Managing Committee, Khonjoy A Government Lower Primary School, bud sa ka jingdwai na u S.M. Sangma, ka jingkren pdiang na u S.D. Shira, ka jingrwai kyrpang na ka Khonjoy Church Choir bad ka jingkren khublei na u B.R. Marak, Secretary jong ka Managing Committee.