Plie u Bah Badhok da ka madan Futsal ban pynshlur ïa ki samla ban ïalehkai bad kiar na ka dih buaid

Nongpoh, Lber 11: U Bah Badhok Nongmalieh u wei naki rangbah ba ju pynshlur bad ai mynsiem ïaki samla ban ïalehkai bad kilan met u la lah ban plie ïa kawei ka madan Futsal kaba la ai kyrteng kum ka Rumen Futsal Ground haka shnong Mawdiangum hajan ka dukan Jadhi kaba dei ka dukan bala long trai hi da u Bah Badhok.
Ïa katei ka madan ïalehkai Futsal la wan ban plie paidbah hynnin ka miet da u Bah Mayral Born Syiem MLA ka Nongpoh kum u kongsan, haka jingdonlang ki khun ki kti, ki bahaiing hasem, ki nongïalam shnong jong ka shnong Mawdiangum, ki riew ïeid ïalehkai phutbol bad kiwei kiwei kiba la donlang.
U Bah Badhok Nongmalieh haba kren ha katei ka sngi u la pynpaw ka jingsngewkmen hadien bala ïoh lad ban plie paidbah syndon ïa katei ka madan, bad kane ka long kum ka jingplielad ïaki khun samla ka thaiñ Nongpoh ban lait naki jingmlien ba sniew khamtam ki jingdih buaid, hynrei ban pynmlien ïalade ban lehkai bad ban kilan met naka bynta ka jingkoit jingkhiah.
Na ka liang u Bah Mayral Born Syiem MLA ka Nongpoh haba kren ha kane ka sngi u la ai ka jingïaroh ïa u Bah Badhok Nongmalieh u ba la ïohi jngai ban tei kum katei ka madan naka bynta ki khun samla jong ka thaiñ khamtam ka jingnang kiew jong ki nongseng kam lajong bad kane ka long ka jingsarong ha kaba kum u nongmihkhmat un dang bteng ban shakri ban ai mynsiem bad khamtam ban kyntiew ïaka dong ka thaiñ hi baroh kawei.
U ong ruh ba kane ka sienjan kan ïarap ban pynïoh ïa ka met kaba koit ba khiah.