Mawkyrwat, Ïaïong, 20: Ka jingïalehkai jong ki skul kaba la tip kum ka Ranikor Block Level Inter-School Athletics Meet 2023 mynta ka sngi ka 20 tarik u Ïaïong, 2023 la ïoh ban plie pyrda ha kaba u bah B.J. Kharshandi, MCS, SDO (C) jong ka Ranikor Civil Sub Division, South West Khasi Hills District u la long u kongsan ha ryngkat ka jingïadonlang u bah D. Syngkon, District Sports Officer, South West Khasi Hills District.
Ïa kane ka Ranikor Block Level Inter-School Athletics Meet 2023 la pynïaid da ka ophis jong u District Sports Officer, South West Khasi Hills District, Mawkyrwat lyngba ka District Sports Promotion Society, South West Khasi Hills District.
U bah B.J. Kharshandi, MCS, SDO (C) jong ka Ranikor Civil Sub Division haba kren ha ka jingïalang la pynpaw ka jingaikhublei na ka bynta ka ophis jong u District Sports Officer, South West Khasi Hills District ïa kaba u la shim ïa kane ka synjam ban pynlong ïa kum kine ki jait jingïalehkai kiba long ka jingaimynsiem na ka bynta jong ki khynnah skul khamtam eh ba ma ki kin ïoh ban pyni bad pynpaw pyrthei ïa ki sap ba ki ki don. Namarkata, u kyrmen ba lyngba kane ka lympung ki khynnah skul kiba na kane ka Ranikor Block kin sa ïoh shibun ki jingmyntoi bad ba kin nang lah ban kiew na kawei ka por sha kawei pat lyngba ka jingtrei shitom jong ki.
“Ym tang ba kin ïoh ban pyni ïa kita ki sap jong ka jinglah jong ki ha ki jait jingïalehkai tang hapoh jong ka Block Level hynrei lad ki trei shitom kin sa ïoh ban kiew sha ka distrik, sha ka state bad sha kiwei de ki bynta”, kren ai mynsiem u bah Kharshandi ïa ki khynnah skul. Ha kajuh ka por u la ai mynsiem ïa ki ba ki dei ban don ka mynsiem jong ka jingïakhun bad jingaiti ha ka bynta ba ki thmu.
Lah ban kdew ba ha kane ka Ranikor Block Level Inter-School Athletics Meet 2023 ki don baroh 12 tylli ki skul na kylleng ki shnong kiba hap hapoh ka Ranikor Block. Haba phai ha ki jingïalehkai, la sdang nyngkong da ka jingïamereh bad ki Long Jump, ki throw bad kiwei dei ha kaba ki khynnah skul shynrang bad kynthei ki la ïoh ban ïa shimbynta shit rhem.
Ha kane ka sngi la ïoh ruh ban sam ïa ki khusnam kiba jop ha ka Long Jump jong ki khynnah shynrang ba 18 snem ha kaba u Silchang A. Marak na ka Indira Gandhi Secondary School u la ïoh ba nyngkong (5.34m), ba ar u Rongsim P. Marak (4.91m) bad ba lai Chanang S. Sangma (4.87m), katba jong ki khynnah kynthei ba 16 snem pat ka Nengchi Sangma ha ka kyrdan nyngkong, ka Labianghun Nongtnger ha kaba ar bad ka Dapynkmenshisha Sanglyne ha kaba lai.
Nangta, ha ka Shut Put jong ki khynnah shynrang ba 16 snem ba nyngkong u Gerald Hahshah, baa r u Sengsrik D. Sangma bad ba lai u Akim D. Marak. Ha ka Discuss Throw pat jong ki khynnah shynrang ba 18 snem u Peter R. Marak ha ka kyrdan ba nyngkong, u Tusanto Hajong u wan ba ar bad u Davidson Pariong u wan ba lai.
