Kynshi, Ïaïong, 20: Hapdeng ka jingkyrduh kam kyrduh jam ha la ka jong ka jylla, bun ki Samla na nongkyndong, kynthup ïa kiba dang duna ka jingnang jingstad, ki la leit ban leit wad bylla shabar jylla bad bun napdeng jong ki, ki la ïoh la ka kam ka duk kaba bit kaba biang.
Ïa kane la lap bad ïoh sngew na ka jingphla jong kine hi ki Samla bad ki rangbah kiba la lah ban ïeng ha la ki jong ki kjat, ha ka Orientation Programme ba la pynlong da ka Shnong Kynshi Mawria ryngkat ka jingïatreilang ka Extension Training Centre jong ka State Institute of Rural Development, Nongsder ha ka 19 bad 20 tarik mynt au bnai ha Kynshi Mawria.
Kane ka Orientation Programme ne ka prokram ban pynsngrewthuh kadei halor ka jingïarap ba ki paidbah nongkyndong ki ïoh na ka skhim DDU-GKY, ha kaba ki ophisar na SIRD bad kumjuh ruh na Mawthadraishan Block bad West Khasi Hills District bad kumjuh ruh ki nonghikai na ki Training Centre ki la wan ban ai jinghikai bad pynsngewthuh.
Uwei na kine ki Samla u kyrteng u Rymphang Syiemlieh na ka Shnong Kynshi, u la ïathuh ba mynshuwa u long uba lehraiñ bieit bad um ju nud ban tur shakhmat ban wad ïa ki kam ki jam bad khamtam leit shabar. Hynrei dei hadien ba u la ïoh jingtip bad jingpynshai halor ka skhim DDU- GKY, u la ïohlad ban trei ha ki BPO ha Gujrat bad u lah ban kyrshan lem ïa ka ïing ka sem jong u. U la ïathuh ruh ba u mad bun ki jingeh ha kaba nyngkong naduh ka ktien ka thylliej, ka bam ka dih bad kiwei kiwei. Hynrei u la ïai shah. Mynta u la ïathuh ba u la ïoh jingtyrwa wat ban trei shabar ri ruh.
Uwei pat udei u Bah Arjunstar Syiem na Umjakoit, uba la don la i lok bad i khun bad u dang pule tang ha ka Class VIII. Lyngba ka jingïarap ba u ïoh na ka DDU-GVK, u la pyndep ïa ka jinghikai ha ka jingtrei Mekhanik, kaba long ka jinghikai kaba tang lai bnai. Hadien kane u la trei bad kawei ka kompeni ha Guwahati. Hadien kane pat u la ïoh jingtyrwa ha ka Kompeni TATA Shillong bad mynta u la long u head technician ha kane ka kompeni. “Dei namar ba nga pyrkhat ïa la ka jong ka lawei bad ki khun ki kti, nga la shah ïa ki jingeh bad ki jingshitom bad mynta nga kmen ba nga la ïoh ka kam kaba biang”, u la ong.
Ha kane ka prokram ba pynkup burom ruh ïa u Samla Rymphang, ia u Bah Arjunstar bad arngut ki samla kynthei kiba dei shipara na Kynshi , tangba kim shym lah ban wan, hynrei la wan mihkhmat da i kpa jong ki.
Nalor kine atngut ki don bun kiwei pat ki Samla shynrang bad kynthei na Mawthadraishan Block kiba la trei ha kylleng kylleng ki jaka jong ka ri India lyngba ka training ba ki ioh da ka jingkyrshan ka DDU-GKY.
Ha kine ki arsngi ba ai jinghikai la ïadon lang ruh u BDO Mawthadraishan Block, Bah L. Myrthong, Bah P. Sohkhlet, Sordar Kynshi Mawria, Bah R. Marweiñ, Sordar Kynshi Diwah, ki Samla bad ki longkmie longkpa jong ka Shnong Kynshi Mawria, Kynshi Mawphynaiñ bad Kynshi Diwah.
Nalorkane ka jingai jinghikai na ka liang ka SIRD kan ïalam ruh ïa kiba sha kane ka training ban leit jngoh ïa ki training Centre ha Guwahati khnang ba ki samla bad ki kmie ki kpa kin lap hi da la ki jong ki khmat ïa ki samla kiba la ai ai training ha kine ki Centre.
