Shillong, Naiwieng 26: Kum shi bynta ban kyntiew ïa ki khun samla kiba don sap ka seng ki samla pule ka Khasi Student Union, Nongthymmai Circle kala plie paidbah ïa ka jaka kilanmet kaba la tip kum ka Maitshaphrang MMA and Fitness Team, bad ïa kane ka prokram plie ïa katei ka jaka la pynlong ha Lumïawblot Community Hall, Nongthymmai.
La wan ban plie paidnla wan ban plie paidbah ïa kane ka Maitshaphrang MMA and Fitness Team da u President ba rangbah jong ka seng KSU sengkmie, u Samla Lambokstar Marngar ha ka jingwansakhilang u Rangbah Shnong ka Lumïawblot Pyllon u bah Don Khongshei uba la long u synbud kongsan ha kane ka sngi bad kumjuh ruh u MDC ka thaiñ u Bah Latiplang Kharkongor nalor kiwei kiwei pat.
La pynbit pynbiang ïa kane ka Maitshaphrang MMA and Fitness Team dei lyngba jong ka sport committee jong ka KSU Nongthymmai Circle bad ka jingplie ïa kane ka long kum shi bynta ban ailad bad ban pynshlur ïa ki samla ha ka kilanmet bad kumjuh ruh ban lait na ki jingdih kiba sniew kham tam eh ka jing jyllei u drok ha ka imlang ka sahlang.
Ha kane ka sngi na ka liang jong ka seng ka la ïoh ruh ban pynkup burom ïa ki samla kiba la wanrah nam da kaba khur takma dang shen ha ka ïakop ñiah cycle kaba la long ha Tawang Arunachal Pradesh bad ha Punmudi kerela.
Kitei ki samla kiba la shah pynkup burom ha katei ka sngi ki kynthup ïa u Samla Apshai Griffit Ñiangti bad u Samla Ridor Ñiangti. Ban pynbyrnia ha kane ka sngi ba plie ïa ka Maitshaphrang MMA and Fitness Team ka kynhun ki nongïalehkai MMA ki la ïoh ruh ban pyni rynsan katto katne ka jingïalehkai Mixed Martial Arts ryngkat bad ka ïalympat (wresling).
