Jam u samla Badonkupar Synnah sha kawei pat ka wat ha ka 7th Elite National Boxing C’ship

Shillong, Naiwieng 26: U samla Badonkupar Synnah u la pynshohbiej ïa ki paidbah nongkyrshan ka jylla lyngba ka namjop kaba u la khur ha ka kyrdan ïakura jong ka light welterweight 60-63.5kg ha ka sngi kaba ar jong ka 7th Elite Men’s National Boxing Championship kaba la long hynne ka sngi ha SAI Indoor Hall, Shillong.
Kumban shu pynkynmaw kane ka lympung ïakura ka ban kut haduh ka 1 tarik u Nohprah, la pynlong da ka Meghalaya Boxing Association ha ryngkat ka Boxing Federation of India bad la kyrshan lang da ka tnat Sports and Youth Affairs jong ka Sorkar Jylla.
Ha kane ka sngi, u samla Badonkupar Synnah u la ïa pyni-bor pyrshah ïa u Roopesh Shukla u ba na jylla Madhya Pradesh, u la khur ïa ka jingjop lyngba ka jingtam point kaba la pynhun ym tang ïa u hynrei ïa ki paidbah nongkyrshan kiba la wan sakhi ïa kane ka jingïakhun jong u tei u samla ba mihkhmat ïa ka jylla ha katei ka rynsan. Shuh shuh u samla Badon u la long u ba nyngkong eh napdeng ki nongïakura ka Jylla ban jam sha kawei pat ka wat ha kane ka Championship hadien katei ka namjop.
Haba jam sha ka sngi ba ar jong kane ka Championship, la lah ban pynlong haduh 78 tylli ki jingïakhun ïa kaba ki rangïakura na kylleng ka ri ki la khmihlynti ban ïalehkai bha na ka bynta ban jam sha kawei pat ka wat jingïakhun bad ruh ban khur takma.
Kumba la pyntip, ha kane ka rynsan ïakura la wan ïashim bynta da ki khlur ïakura jong ka Ri kiba la pawkhmat bha, kiba kynthup ïa u rangïakura u ba la khur takma ksiar ha ka South Asian Games, kata u Sachin na Services u ba la ïakhun pyrshah ïa u Vishal Kumar uba na Punjab ha ka 54-57kg featherweight bad u la lah ban khur ïa ka jingjop lyngba ka rai ki nongbishar.
Bad la ïoh ban sakhi ruh ïa u rangiakura uba la khur ïa ka takma rupa ha ka Asian Championship 2019 u Ashish Kumar na Himachal Pradesh u la ïatynjuhbor pyrshah ïa u Kingson na Manipur ha ka featherweight. Ka jingiakhun ka long kaba ïakhaid bha, hynrei u Kumar u la lah ban khur ia ka jingjop.
Kiwei pat ki rangiakura ka Jylla (Meghalaya), ba kynthup ia u Kordor Marwein ha ka lightweight 57-60kg, u la shah rem ha u Aditya Nagar na Uttar Pradesh hadien ba u rephri u la hap ban pynsangeh noh ia ka jingiakhun ha ka wat kaba nyngkong. Kane ka jingpynsangeh ka la wan hadien ba u Kordor u la shah kura tyngeh ha utei u rangiakura uba na UP.
Ha ka 48-51kg flyweight, u Khrawbok Marwein u la iakhun pyrshah ia u rangiakura uba na Bihar u Shiv Kant. Watla u la shah kura bad khyllem ha madan, hynrei u la pyrshang katba lah ban iakhun tyngeh bad ha kaba kut u la shah rem noh hadien ba u la shah tam point ha utei u rangiakura uba na Bihar.