Plie lad ka Ryntihlang Madanlangning Pyllun S&SC ïa ki khynnah bad samla lyngba ki jingïalehkai

Shillong, Kyllalyngkot 29 : Ka Ryntihlang Madanlangning Pyllun Sport & Social Club (RMPS&SC) kaba hap ha Mawkynrew C&RD Block kum shi bynta ban plie lad plie lynti ïa ki khynnah bad ki samla jong ka shnong, ha ka sngi Saitjaiñ jong ka taïew ba lah dep ka la pynlong da ki jingïalehkai kaba la tip kum ka Seasonal Activites 2023 ba kynthup ka jingïaid March Past bad ka jingpynïalehkai phutbol.
Ïa katei ka prokram ba shi sngi ka RMPS&SC ka la ïoh ban pynlong ha madan shnong lyngba ka jingïarap pisa na ka Yess Meghalaya kaba dei kawei na ki shnat treikam jong ka sorkar jylla ha kaban kyntiew ïa ki khynnah bad ki samla donsap.
Ha katei ka sngi ka Kong Amanda Pakynteiñ kaba dei ka Chairperson jong ka Mawkynrew Cup Committee (MCC) ka la ïadonlang kum ka kongsan kaba la shim ruh ka salute ïa ka jingïaid March Past, ha ka jingïadonlang ryngkat u Bah Ïohnam Dohling Sordar Shnong Umtngew kum u symbud Kongsan, Bah Khian Warmalai Sordar Shnong Madanlangning, Bah Kobat Mukhim President jong ka Club, ki riew rangbah, ki longkmie, ki samla shynrang bad kynthei haduh ki hep kiba rit.
Haba phai sha ka jingïaid March Past ki don 4 tylli ki kynhun kiba la ïashim bynta ba kynthup ka Ïaid Shaphrang SC, Lhyon Madanlangning SC, ka Madanlangning SC bad ka Rangngei SC. Ïa ka nam jop ha katei ka jingïaid March Past la ïoh rah da ka Lhyon Madanlangning SC kaba ïoh khur 10 poiñ, ka Rangngei SC ïa ka nam ba ar ka ïoh 9 poiñ, ka Ïaid Shaphrang SC ka jop kyrdan ba lai da 8 poiñ bad ka Madanlangning SC ka wan ha ka kyrdan ba khatduh da 7 poiñ.
Haba phai pat sha ka jingïalehkai phutbol jong ki U-16 ki kynthei ki don 4 tyll ki team kiba ïashim bynta ba kynthup ka Mawpyrshong SC, Lhyon Madanlangning SC, ka Madanlangning SC bad ka Rangngei SC. Ka Lyon Madang-langning SC ka la long ka nongjop hadien ba ka la pynliem noh ïa ka Mawpyrshong SC da 3-2 kol.
Katba ha ka U-16 ki shynrang baroh ki don 6 tylli ki team ba kynthup ka Lyon Madanlangning SC, Nongrangngei SC, Sawlad Combined, Mawrang SC ka Mawbynna SC bad ka Mawpyrshong SC. Ka Lhyon Madanlangning SC ka la long ka lahduh hadien ba ka la pynliem noh da 1-0 kol ïa ka Mawpyrshong SC.
Ka Kong Amanda Pakynteiñ haba ai jingkren kum ka kongsan ka la kyntu kynpham ïa ki khynnah bad samla ba kidei ban pyndonkam hok ïa ka sap ba ki don bad ban kiar na ki jingmlien kiba sniew khamtam na ki jingdih pynbuiad. Ka la ai khublei ruh ïa ka Sport Club kaba la pynlong ïa kaba kum kine ki jait jingpynïalehkai ban plie lad plie lynti ïa ki khynnah bad ki samla kiba don shisha ka sap ïalehkai.