Plie ka tnad Fishery ïa ka Sanctuary bad Fish KIOSK ha Mawshynrut

Nongstoiñ, Risaw, 20: Kum shi bynta jong ka jingrakhe ïa ka jingïoh Jylla ba pura, ka ophis jong u Superinten-dent of Fisheries Nong-stoiñ, ka la pynlong ïa ka jingplie paidbah ïa ka Fish Sanctuary ha Nongshram, Mawshynrut Block bad ïa ka Fish KIOSK ha Shallang Mawshynrut Block.
Kane ka jingplie ka la long ha ka sngi palei jong ka taiew, ha kaba la wan ban ot ribbon da u bah J.H Suchiang Deputy Director Of Fisheries, Meghalaya, kum u kongsan, ha ryngkat ka jingïadonlang jong u bah E.R Laloo Superin-tendent of Fisheries, Nongstoiñ, bah B.Majaw Fishery Officer Nongstoiñ, ki nongtrei jong ka Fisheries Department bad paidbah ba ïoh jingmyntoi na kine ki skhim.
Haba ai jingkren ha kane ka sngi plie, u bah J.H.Suchiang u la ai khublei kyrpang ïa ki nongshong shnong ka thaiñ, kiba la pynleit jingmut bha ïa kine ki skhim ne ki jingmyntoi. U da ïaroh ruh ïa ka jingtrei shitom, jingïaishah wat hapdeng ki jingeh bad tad haduh ban da ïoh pyndep ïa kane ka kam.
U la pynshlur ïa kiwei pat ban wan shakhmat ban ïoh bynta lang ïa kine ki skhim ba la ai da ka Sorkar, la ka long na ka Sorkar Jylla ne Sorkar Kmie lyngba ka tnad Fisheries, khnang ban kyntiew ïa ka ïoh ka kot, ka roi ka par bad ka bha ka miat ha ki shnong ki thaw bad ha ka Jylla hi baroh kawei.
Ka Fish Sanctuary bad Fish KIOSK, ki dei ki skhim ai jingïarap jong ka tnad Fisheries, lyngba ka “Meghalaya State Aquaculture Mission 2.0 (MSAM 2.0)” bad ka Central Scheme Pradhan Mantri Matsya Sampada Yojana (PMMSY) 2020-21”.
Ka Nongshram Fish Sanctuary ka thmu ban pynneh pynsah ïa ki symbai dohkha tynrai, kiba la sdang ban duh jait bad ban pynneh pynsah ruh ïa ki sim ki doh bad ki syntiew ki skud kiba don ha ki um. Katba ka Fish KIOSK Shallang, ka thmu ban pynmih bad die ïa ki dohkha tynrai kiba khuid ba suba bad ba bang ba shngiam ban pynmih da ki trai nongshong shnong.