Shillong, Nohprah, 30: Ka Sein Raij Niamtre Shillong hynne ka sngi Thohdieng ka la rakhe ïa ka lyngkhuh sngi ïap ba 160 jong u Khlawait ka Jaidbynriew na Rilum Jaiñtia, da kaba plie artad ïa u mawbuh shyiemg (Moo Booh Chyien) ha jaka ba don ka ‘Kambel Shullai Eco-friendly crematorium’ Jaïaw, Shillong.
Ïa utei u mawbuh shyieng ba la tei lyngba ka skim MLA la wan ban plie paidbah da u MLA ka Shillong North, Bah Adelbert Nongrum ha ryngkat ka jingdonlang ki nongïalam ka Sein Raij Niamtre, nangta i Kong Patricia Mukhim, DHS barim ka sorkar jylla Dr. Aman War bad kiwei kiwei.
Haba kren ha ka jingïalang, u Bah Adelbert u la pynpaw ïa ka jingkmen ba u la ïoh ban mang na ka skim MLA na ka bynta ban shna ïa u maw buh shyieng ha katei ka jaka bad ïoh ban plie ha katei ka sngi kynmaw burom ïa ka lyngkhuh sngi ïap u Kiang Nangbah.
“Kam myntoi tang ban shu leit buh syntiew hynrei kaba kongsan ka long ban bud ïa ki dienjat bad ki nuksa ba la buh da u Kiang Nangbah ban pyntikna ba ka Jaidbynriew kan ïoh ïa ka jingïada,” u la ong haba kren kum u Kongsan. U ai ruh ka jingïaroh ïa ka Sein Raij kaba la pynneh pynsah ïa ka riti dustur haduh mynta mynne bad kumta u kyntu ruh ïa ka jaidbynriew Hynñiewtrep la ka long naduh ki Khasi Pnar, Bhoi, War bad Lyngam ban tylli lang kawei.
Shuh shuh u ong ruh ba u Kiang Nangbah watla u dei u Khlawait ba Khraw ka Jaidbynriew hynrei u dei uba mih na ki riewpaidbah hynrei u ïakhun pat na ka bynta ban pyllait ïa ki briew lajong.
Kiwei pat kiba kren ha kane ka sngi ki kynthup naduh u General Secretary ka Sein Raij Dr. Omarlin Kyndiah uba la ïathuh khana lyngkot shaphang ka jingim jong u Kiang Nangbah.
Na ka liang ka Sein Raij ka pynpaw ruh ka jingsngewnguh ïa u MLA na ka bynta katei ka skim kaba u la mang kyrpang na bynta jong ki.
