Plie ka Balang U Blei ïa ka Rehabilitation Center ban pynim biang ïa ki samla ba la ngop ha ki jingdih buiad

Nongpoh Nailar, 06: Da ka jingthmu ban wanrah ïaka jingkylla haki khun samla hadien ki jingbakla, na ka jingsniew sha ka jingbha bad ban wanrah ïaka jingim kaba laitluit hadien jong ka jingkyrni bad shah teh shah khum ha ki jingdih buaid khamtam u drok bad kiwei kiwei, ka Balang U Blei Meghalaya bad Assam lyngba jong kawei ka shnat treikam jong kane ka Balang kaba la tip kum ka Business Association Church of God Meghalaya & Assam haka sngi Saitjain ka la lah ban plie paidbah noh ïa kawei ka jaka syllok kaba la tip kum ka Jingaiei Rehabilitation Centre haka shnong Syadrit, Umsning ha Ri Bhoi District.
Ïa katei ka Rehabilitation Centre la wan ban plie paidbah da u Rev Dr AC Moore uba dei u President jong katei ka shnat treikam jong ka Balang, haka jingïadonlang u Myntri ka Sorkar Jylla uba dei peit ïaka tnat ïalehkai haka jylla u Bah Shakliar Warjri, u Dr Celestine Lyngdoh MLA ka Umsning, ka Kong Mac-dalyne Sawkmie Mawlong MDC, Rev M Shangpliang ba dei u President jong katei ka Rehabilitation Centre, u Rev AM Mihsil Secretary, ki dkhot jong katei ka Centre ki Pastor naka Balang u Blei bad ïa katei ka jaka la ai sngewbha da ka kong Phain Thangkhiew sha ka Balang u Blei ban buh ïa katei ka Center ban wanrah pat ka jingkyrmen sa shisien ïa kito ki khun samla kiba la ngop haki jingdih buaid.
Na ka liang ki riew pawkhmat haba ai jingkren ha katei ka sngi ki la ong ba kum kine ki jaka ban tei pynbha biang ïa kaba lah sniew ka long kaba donkam haduh katta katta namar kane ka juk thymmai kaba mynta ki briew ki im ka dei kaba bun ki jingsniew lada na ka ing ka sem kim lah ban teh lakam ïa la ki khun ki kti, hynrei lyngba katei ka Center kan long pat ka jingkyrmen ïaki khun samla ba kin phaidien ïala ka jingim khamtam ban jan sha u Blei, kumba ka jylla Meghalaya kala dei ruh kawei naki jylla kaba bun naki khun samla kila ngop ha u drok.
U Bah Shakliar Warjri uba dei u myntri sorkar uba peit ïaka kam ïalehkai u la kular ban pynmang jingïarap na ka sorkar da ka madan ïalehkai basket Ball na ka bynta ba ki ban wan sha ha kane ka jaka kin ioh ban pynlut por ruh haki jingïalehkai, bad kiwei kiwei ki jingdonkam naka bynta ka jingbit jingbiang jong katei ka Center ka ban ai jingshakri bad long ruh ka jingkyrkhu ïaki khun samla bad ka imlang ka sahlang.