Phum pra ka ktem Congress, lai ngut yn pdiang sha ka NPP mynta ka sngi
Shen yn pdiang sa na kiwei ki party
Shillong, Rymphang 18 : Haduh lai ngut ki nongïalam ka Congress kin pynïasoh pura noh sha ka National People’s Party (NPP) ha ka jingïalang pdiang burom kaban long mynta ka janmiet sngi Nyngkong ha nongbah Shillong
Ki tyllong khubor na ka NPP ki ïathuh ba kitei ki lai ngut ki nongïalam ka Congress ki kynthup ïa arngut ki MDC, kata u MDC na Mawkyrwat Bah Carnes Sohshang bad uwei pat dei u MDC ka Mairang Bah Batskhem Ryntathiang. Katba uwei pat u nongïalam ka Congress dei u Bah Donevan Kharwanlang MDC barim ka Congress na Sohra.
Kane ka jingwan pynïasoh sha ka party ka long ruh kum shi bynta ka jingpynkhreh ban pynkhlaiñ shuh shuh ïa ka NPP na bynta ka elekshon MP kaban sa long shen ha kine ki khyndiat bnai bad kawei pat ka long ruh na bynta ka elekshon MDC kaba la khmih lynti ba kan long la kumno kumno ha ki bynta ba khatduh jong une u snem.
Haba phai sha u MDC ka Mawkyrwat ba dei ruh u Executive Member ka KHADC, la ïoh jingtip ba ka jingïakren ka la ïaid la kham slem mynta bad na ka liang ki nongïalam ka Congress na katei ka constituency bad ruh na ka distrik bun kiba la resaiñ.
Katba ïa u MDC ka Mairang pat la dep ban pdiang burom naduh u bnai ba la dep ha ka jingïalang kaba long ha Mairang hi. Ïa une u rangbah la pdiang burom da u Working President ka NPP, Bah Hamletson Dohling ryngkat ka kyrtong MP Kong Ampareen Lyngdoh.
Kitei baroh arngut ki MDC ka Congress ki la wan ba ar ha ka elekshon MLA ba la dep ha kaba u Bah Carnes u la shah rem da kumba 1200 vote ei ei ha u Myntri ka tnad PHE ha kato ka por, u Bah Renikton Lyngdoh Tongkhar. Hynrei u Bah Batskhem pat u la shah rem salia ha u Bah Metbah Lyngdoh ba dei ruh u Lamphang ka Ïing Dorbar Thawaiñ ka jylla ha kato ka por.
U Bah Donevan watla um shym la aireng ha kane ka elekshon MLA ba la dep hynrei u la trei borbah na ka bynta ka jingjop jong u Bah Gavin Mylliem ha ka jingïakhun kaba salit bha bad u kyrtong ka UDP Bah Titos W Chyne na Sohra Constituency.
Ki tyllong khubor ki ïathuh ruh ba ka jingïakren ka dang ïaid mynta na bynta ban pdiang burom sa ïa ki nongïalam ka UDP bad na kiwei kiwei ki party.