Ka sorkar MDA ka la pheil ha ka ktien Khasi-Garo, ILP bad kren ïasuk HNLC ong u Chief Whip ka Liang Pyrshah

Shillong, Rymphang 18 : U Chief Whip ka Liang Pyrshah u Saleng A Sangma u la ong ba ki paid nongshong shnong jong ka jylla ki sngewdiaw bad kim don jinghun satia namar kane ka sorkar Meghalaya Democratic Alliance (MDA) ka la pheil ban ïoh pynrung ïa ka ktien Khasi bad Garo ha ka Khyrnit kaba Phra jongka Riti Synshar ka Ri India.
“ Baroh ki paid nongshong shnong kim hun satia halor kane ka kam. Wat la ka sorkar ka shah ban kren ne pyndonkam ïa kine ki ar tylli ki Ktien hapoh Assembly hynrei kane kam pat biang satia” ong u Saleng.
Une u MLA ba la lai sien lai wat jongka Gambegre u la ong kat haduh mynta ka sorkar NDA hapoh ka jingïalam ka BJP ha Delhi kam pat wanrah kano kano ruh ka Bill halor kine ki ar tylli ki Ktien wat la ka election mynta ka la hakhmat ruh. Nalor kane u la ther ruh ïa ka sorkar MDA ha kaba ïadei bad ka rukom bud dien ïa ka ILP bad ka sorkar pdeng namar ïa kane ruh la shu sahteng ha suiñ khlem pat pyntreikam ha ka jylla.
Nangta halor ka jingkren ïasuk bad ka seng HNLC ruh une u MLA u la ther tyngeh ïa ka sorkar MDA da kaba kynnoh ba ka dei ka jingkheiñ sting jongka sorkar ba sa pulom ka jingkren ïasuk bad weng noh ka seng HNLC na ka miej jingkren ïasuk.
U la ong “ ïa kane lah ïohi shai kdar ïa ka jingkheiñ sting jongka sorkar lym kumta balei ka seng HNLC kan shu weng noh lada ym don daw ei ei. ïa ka daw bah lah ban tip tang da ka sorkar, ki ksiang bad ki nongïalam ka seng HNLC.Namar ngam ïadon bynta ha ka jingkren ïasuk ngam lah ban kynthoh than ruh. Hynrei khlem pep kan don beit kaei re kaei kaba bakla na kata ka daw ki sa weng na ka jingïïakren lym kumta balei kin shu weng noh namar baroh ki kwah ïa ka jingsuk namar mano bym kwah ban im suk baroh ki kwah ïa kata” .
Ha kaba iadei bad ka jingtreikam jongka sorkar MDA -2 ha kine ki 11 bnai u Saleng u la ong “ Ai ki paidbah kin bishar ïa ki jingtreikam jong ka sorkar MDA. Ki la kular ban pynïohkam 5 lak ngut bad bun kiei kiei.Mynshwa la pynbna ïaka pisa ban pynbha briew ïa ka nongbah Shillong bad Tura ngam tip katno la pyndonkam ïa ka pisa ne katno la jah rngai bad sa katno ka pisa ka dang don ruh. Bun ki prokram la pynlong ym lah len wat mynta ka tamasa Tlang ruh ka dang ïaid. Bun kiei kiei la pynlong ym tip shuh hato kine ki khring ne em ïa kin ongwan jngohkai da kaba pynlut pisa bun haduh katne katne. Hato yn ïoh biang ïa ka pisa ne kan wanrah jingmyntoi hadien habud bad hato ki nongwan jngohkai kin wan biang.Lada ïai shim ram na kiwei ki ri ne na ka World Bank hato ym dap ram ka jylla namar ka long kaba donkam ban peit sa katno dang don ka pisa ha baroh ki liang”.