Mukhla, Rymphang 01: Ka Seiñ Raij Mukhla hapoh ka jingïalam Pa Langdoh Ñiam ryngkat bad ki Waheh Sankur “Kur Lyngdoh, Shylla, Suna, War, Sari” mynta ka sngi ki pynlong ïa ka jing pynkyntang ïa u Maji Ñiam ka Raij Mukhla mynta ka sngi Thymblein ha ïing Langdoh ïing Blei.
Ïa u Samla Firstly Sari la jied la pynkyntang Maji ïa u mynta ka sngi hadien ba la ieh noh kam u Maji Ñiam barim ka Seiñ Raij Mukhla, kumta ka Dorbar Sankur ryngkat bad da ka jingmynjur ki Blei la jied ïa u Firstly Sari kum u Maji Niam Thymme, te mynta ka sngi la lah ban pyndep ïa ka jingleh ñiam kyntang Maji Niam ha khmat u klong u skaw i Pyrnah i pyrjin ka pliang ka Nar bad u tylli u kyntien.
Ïa kane ka kam Maji Niam kane ka kam kaba u Maji un ai ïa ka jingshakri ïaka ñiam ka rukom ha shi lynter ki sngi ki jingim jong u katba u dang lah ban shim ïa kane ka kam Blei, ha kane ka sngi pynkyntang ïa u Maji Ñiam ka Seiñ Raij Mukhla la wan ban ïa sakhi lang da u Pa Daloi ka Elaka, u R.M Garod Elaka Nangbah bad u Pator ka Raij Mukhla u Rghh. Dibormi Thubru bad ha kane ka sngi la wan ban ïa shim bynta lang daki khun Samla ka Seiñ Raij Mukhla bad ki long kmie ha ryngkat ka Niam tynrai.
Hadien bada dep ban pyndep ïa ka jingleh Niam ha phyllaw ïing ka Bei Langdoh da ka Ñiam Suit Niam chor da u Syien ka Dakha bad i pyrnah i pyrjin te ka Bei Langdoh Ñiam ka Seiñ Raij Mukhla ka la pynkham ïa u Maji Niam ba thymme ka Seiñ Raij Mukhla da u Tylli u Kuchi kum ka dak ba ka Bei Langdoh ka la ai bor ïa u Maji Ñiam ba la lah ban sdang ban shim bynta ban pyndep ïa ki jingleh Ñiam leh rukom hapoh ka Seiñ Raij Mukhla. Kane ka long katkum ka jing pyllait khubor u Standbyme Sari uba long u Waheh Sari na ki Waheh Sankur uba wa mihkhmat na ka kur Sari.
