Phuh ka jingrakhe ïa ka sngi laitluid ka ri India ha kylleng ki Distrik jong ka Jylla Meghalaya

Khliehriat, Nailar, 16: Ryngkat lang bad ka ri India hi baroh kawei, ka East Jaiñtia Hills District ka la rakhe ïa ka sngi laitluid kaba 77 jong ka ri India kaba la pynlong ka madan Khliehriat Higher Secondary School bad ka Myntri ka tnat ka koit ka khiah, ka Dr Mazel Ampareen Lyngdoh ka la pynher ïa ka lama lai rong jong ka ri.
Ki don 22 tylli ki kynhun kiba la shim bynta ha ka parade ba kynthup ki skul, ki Scouts & Guides bad na ka tnat pulit.
Ka Myntri ka la sam ïa ki khusnam pynkup burom ïa ka kong Previan Lapasam kaba na ka shnong Sohkymphor, kaba la ioh khur ïa ka khusnam State Award kum ka Master Craftsman, ka myntri ka la sam ruh ïa ki cheque bad jingai jingiarap sha ka Swer D Family SHG kaba na Khliehriat East, ka Kynhun baduk SHG na Latyrke, ka Ïakhihlang Village Organizations (VO) na shnong Dkhiah East bad ka Laidong Village Organization (VO) kaba na shnong Narwan bad la pynbna ruh ïa ka mang tyngka kaba T92,82,500/- ( khyndai phew ar lak phraphew san hajar san spah tyngka) kaba la ai ïa ki Village Organizations (VOs) kiba don hapoh ka district bad ruh ka jingiarap daka ram (loan) kaba T 1,03,50,000/- ( shi klur, lai lak san phew hajar tyngka) kaba la pyllait na ka bynta ki 35 tylli ki kynhun Self Help Groups (SHGs) kiba don hapoh ka district, la ai ruh ïa ka khusnam “Best implementation of Mission Amrit Sarovar, 2023” sha ka Wahsarang VEC kaba hapoh ka Wapung C&RD Block bad ka Myntriang VEC kaba hapoh ka Saipung C&RD Block.
Ha kane ka sngi, la ai ruh ïa ki khusnam sha ka Bataw PHC bad ka Pamra Paithlu PHC, kiba dei ka PHC kaba trei bha ïa ka kam bad kane ka khusnam ka dei hapoh ka Kayakalp programme 2023-2023.
Ka khusnam ba kyrpang la ai ruh ïa ka Bataw PHC kum ka PHC kaba trei bha hapoh East Jaiñtia Hills District ha kaba ïadei bad ka Meghalaya Health Insurance Scheme (MHIS) bad ka Ayushman Bharat Pradhan Mantri Jan Arogya Yojana(ABPM-JAY).
Ha ka jingrakhe ïa kane ka sngi laitluid, la don ki jinsghad tynrai bad ki jingshad ieid ri ba la shim bynta da ki khynnah na ki skul bapher bapher kiba napoh ka district, ka la don ruh ka jingpyni ñiah motro bike lane ka Bike Stunts da ki Biker Association na Sutnga bad ïa ki prize la ai ruh sha kito kiba jop ha ka march- past ha kaba ka Morning Glory Secondary School, Ladrymbai wan ba bad ka Oxford Secondary School (Girls), Ladrymbai ka wan ba ar
Kum shi bynta jong ka jingrakhe, ka la don ruh ka jingialehkai football “Friendly Football Match’ kaba la ialeh hapdeng ki heh sorkar jong ka district ba tip kum ka Officers Club of East Jaiñtia Hills District bad ka Khliehriat Bar Association, kaba la ialeh ha madan East Jaiñtia District Sports Association Football Ground, Dieñchynrum, ka la don ruh ka jingai sngewbha sha ki khynnah kynthei bad khynnah shynrang kiba sah ha ki Childrens’ Homes.
Jowai: Ha Jowai la rakhe ïa ka sngi laidluid ka Ri kaba 77th Independence Day’ ïa kaba la pynlong ha madan Jrisaleiñ, Chutwakhu, Jowai ïa ka Lama lai rong jong ka ri India la wan ban pynher da u Deputy Chief Minister ka sorkar Jylla u ma Sniawbhalang Dhar.
Ha kane ka sngi kila don haduh 29 tylli ki kynhun (Contingent) kiba ïashim bynta ha ka March pass kiba kynthup ïa ki kynhun Pulit, NCC, Scouts & Guides, ki samla College bad ki khynnah skul, ïa kaba la shim salute da u ma Sniawbhalang Dhar.
La sam khusnam sha ki PHC, CHC, ïa ki riew shimet ba don bynta ha ka jingïada mariang bad sha ki nongjop ha ka March pass. Ïa ka kyrdan ba nyngkong la ïoh rah da ka St. Marry Mazzarello HSS, ba ar la ïoh rah da ka Jaiñtia Secondary School bad ba lai la ïoh rah da ka St. Michael & All Angels Secondary School.
Ka la don ruh ka jingïashim bynta ha ka jingshad bad jingrwai tynrai da ki kynhun bapher bapher kum ka jingpynbyrngia ïa ki nongwan peitkai.
Ka long ruh ka jingkyrkhu ïa ki 144 tylli ki Self Help Group (SHG) kiba la ïoh ïa ka jingkyrshan pisa kaba la kot haduh Rs.609 klur tyngka, ïa kaba la wan ban sam ïa ka Sanction Order da u Deputy Chief Minister ka Jylla u ma Sniawbhalang Dhar, ha madan Jrisaleiñ, Jowai.
Kane ka jingkyrshan pisa (loan) ïa kitei ki 144 tylli ki SHG ka long shi bynta na ka jingthmu jong ka Sorkar ban pynkup bor shuh shuh ïa ki riew kynthei lyngba ki jingtreikam jong ki lyngba ki kynhun SHG, ïa kane ka pisa la pynïoh lyngba ka Meghalaya Rural Bank. Kumjuh ruh na ka liang jong ka Meghalaya Co-operative Apex Bank kala pynioh ram sha ki 28 tylli ki SHG kaba la kot sha ka Rs.32 lak tyngka.
Ki bor pynïaid District lyngba u Deputy Commissioner bah B.S Sohliya, IAS ha ka jingrakhe jingïohlaitluid ka ri mynta ka sngi ha Jowai kala ai ïa ki khusnam pynkup burom sha ki jaka sumar kiba don hapoh West Jaiñtia Hills District halor ka jinglah jong ki ban wanrah ïa ka jingkhuid jingsuba bad ka jinglah ban ai ka jingshakri lyngba ka jingsumar kaba stet bad ka jinglah ban wanrah ka jingïadei hapdeng ki nongpang.
Kine ki jaka sumar kiba la shah pynkup burom hapoh ka thup jong ka Kayakalp Award ki long ka Jaraiñ PHC kaba la ïoh ka ka nam ‘Best Winning PHC’, ka Iooski kaba la ïoh ïa ka nam ‘Commendable PHC’ bad ka ‘Best Winning UPHC’ kaba la ïoh ban rah da ka Urban Primary Health Centre Loomkyrwiang hapoh ka Urban Public Health Centre.
Ka skhim Kayakalp kadei kaba peit ïa ka jinglah jong ki jaka sumar ban pynïoh ïa ka sawdong sawkun kaba khuid ba suba bad ban khring ïa ka jingïajan jong ki nongpang bad ki jaka sumar nalor ka jingai jingshakri kaba bha tam ia ki nongpang.
Nalor kine la sam ruh ïa ka khusnam sha ki Psiar Sub Center halor ka ‘Reproductive & Health Indicators’, ka Mynska Sub Centre halor ka ‘Communicable Disease and Non-Communicable disease indicator’ bad ka Narting PHE halor ka jingpyntrei bha ïa ka ‘MHIS & PMJAY scheme’.
Ïa kane ka sngi la rakhe kumjuh ha Amlarem ba la pynlong da ka ophis treikam jong ka Amlarem Civel Sub-Division ha madan ïalehkai jong ka Amlarem Sub-Division Sport Association Mini Stadium, ha kaba u ma MLA ka thaiñ u ma Lahkmen Rymbui ula long u kongsan bad kumjuh ha Hima Shangpung la rakhe ha madan ïalehkai Hula ha Moosyiem, Shangpung ha kaba ka kong Santa Mary Shylla kaba dei ka MLA jong ka Sutnga Saipung kala long kum ka kongsan.
Mawkyrwat: Ha South West Khasi Hills la rakhe ïa ka sngi laitluid ka ri Indai ha madan ka Nativity Higher Secondary School, Mawkyrwat ha kaba u Bah Alexander L. Hek, u Myntri Sorkar ba dei peit ïa ka tnad Animal Husbandry & Veterinary, Fisheries bad kiwei, u la pynher ïa ka Lama Lai rong jong ka Ri bad shim ruh ïa ka Rashtriya Salute na ka bynta ki 7 tylli ki skul, kynthup ïa ka NCC, Sngap Syiem College bad ki Pulit.
Kham hadien, u Bah Hek u la plie paidbah ïa ka Nasha Mukt Bharat Abhiyaan (NMBA) ha ryngkat ka jingsynranglang u bah Renikton Lyngdoh Tongkhar, MLA ka Mawkyrwat Constituency, u bah T. Lyngwa, Deputy Commissioner jong ka South West Khasi Hills District ryngkat kiwei de ki ophis sorkar.
Haba phai ha ka jingsam ïa ki khusnam nongjop ha ki nongwan ïashimbynta, ha March Past ka Jingïaseng Kynthei Mawkyrwat Presbytery Secondary School, Mawkyrwat (JKMPSSM) ka la ïoh ïa ka nam jop bud sa ka Maharam Government Higher Secondary School, Mawkyrwat (HGHSSM) ha ka kyrdan kaba ar bad ka Nonglang Secondary School (NSS) ha ka kyrdan kaba lai.
Katba ha ka cultural programme pat, ka Kerlin Secondary School (KSS) ka la wan ba nyngkong, ka Presbyterian Higher Secondary School, Mawlangwir (PHSSM) ka la wan ba ar bad ka Eleven Secondary School, Mawten (ESSM) ka la wan ba lai.
Shuh shuh ha kane ka sngi la pynbna ïa ka jinglah ban treikam bha ne kum ki Best Performance ASHA kata sa ka kong Litalin Jyrwa na ka shnong Jakrem II bad ka kong Driewlin Thongni na ka shnong Awro bad ka Mawthawpdah PHC kaba khuid tam kaa hapoh ka Kayakalp.
Kiwei de ki prokram ha kane ka jingrakhe ki long ka jingleit sam jingbam hapoh ki jaka sumar kata Civil Hospital Mawkyrwat, ki PHC bad hapoh Children of Hope Orphanage, Mawlangwir (Mawkyrwat).
Ha kane ka sngi, na ka liang ka District Administration (Election branch) ka la ai ruh ka jingpynbna ïa u samla Wankupar Lyngdoh Marshillong, (uwei na ki samla uba don ka jingduna ha ki dkhot met) kum u ‘Youth Icon’ na ka bynta ka MP election 2024.
Ha kawei pat ka liang, la pynbna ruh ïa ki nongjop ha ka jingmareh thong ka Independence Day Run 2023 ba la pynïaid da ka ophis jong u District Sports Officer, South West Khasi Hills District ryngkat ka District Administration ha ka 14 tarik u ‘Nailar, 2023 ha kaba ka Marqueemless Ramsiej ka la wan ba nyngkong, bud sa ka Lyntijingkyrmen Kharjahrin ha kaba ar bad ka Bandasharai Marwein ha ka kyrdan ba lai jong ki kynthei, katba ha ka liang ki shynrang pat u Wolbetstar Ramsiej ha ka kyrdan ba nyngkong, u Jomsingstar Ramsiej ha kaba ar bad u Iwelljohn Ramsiej ha ka kyrdan ba lai.
Bad ha kajuh ka sngi, ka South West Khasi Hils District Swimming Association (SWKHDSA) ryngkat ka jingïatreilang bad ka ophis u Deputy Commissioner, South West Khasi Hills District ka la pynlong ïa ka 5th Annual Swimming Competition 2023 ba la kyrshan ruh da ka ophis u District Sports Officer, South West Khasi Hills District ha kaba ïa kane ka jingïakop la pynlong ha Phot Umnew.
RANIKOR CIVIL SUB- DIVISION: Ïa kane ka jingrakhe ïa 76th Independence Day la pynlong ruh hapoh Ranikor Civil Sub Division, Ranikor ha kaba u bah Pius Marweiñ, nongmihkhmat jong ka Ranikor Constituency u la pynher ïa ka Lama lai rong bad shim ruh ïa ka salute na ka bynta ka jingïaid parade jong ki 9 tylli ki skul ba la pynlong ha madan jong ka Nolikata, Ranikor C&RD Block.
Ha ka March Past, ka Nolikata Higher Secondary School (NHSS) ka la rah ïa ka nam lahduh bud sa ka Indira Gandhi Memorial School (IGMS) ha ka kyrdan kaba ar bad ka Border Achik Secondary School, Puksora (BASSP) ha ka kyrdan kaba lai.
Ha ka Cultural Programme, ka Mawpyllun Upper Primary School (MUPS) ka la wan ha ka kyrdan ba nyngkong, ka Jingaiti Secondary School, Nonghyllam (JSSN) ha kaba ar bad ka St. Claret School, Munai (SCSM) ha ka kyrdan kaba lai.
Hadien kata, la pynbud da ka jingïalehkai paralok hapdeng ki ophisar jong ka Ranikor pyrshah ïa ki khlieh nongsynshar shnong, bud da ka jingsam jingbam sha ki khynnah rit.
Nongstoiñ: Ha West Khasi Hills ryngkat lang bad ki paitbah jong ka thaiñ, la rakhe ïa ka sngi Laitluid kaba 77 jong ka Ri India, da ka mynisiem kaba shitrhem bad ka mynsiem ieid ri. Ki paidbah na jngai bad najan jong ka distrik ki la wan sakhi ïa kane ka sngi kyrpang jong ka Ri, ha madan ïalehkai jong ka skul St. Peter’s Higher Secondary School, Nongstoiñ.
La sdang ïa kane ka sngi da ka jingpynher ïa ka lama Lai Rong jong ka Ri, ha kaba u Bah Paul Lyngdoh, Myntri ka tnat Arts and Culture, Social Welfare, Textiles bad Tourism, jong ka Sorkar Jylla, u la pynher ïa ka lama ka ri India ban sngew sarong ïa la ka jong ka ri bad ban burom ruh ïa ka, la bud pat sa da ka jing rwai National Anthem, ha kaba u la shim ruh ïa ka Rashtrya salute na ka bynta ki 24 tylli ki parade contingent kaba kynthup ïa ki pulit, home guard, NCC, scout and guide bad ki khynnah skul.
Kiwei pat ki prokram ha kane ka sngi ki kynthup ïa ka cultural programme, ka khusnam Kayakalp ka leit sha ka Maweit, PHC, Maroit PHC bad ka Umsohpieng Sub- Centre, kumjuh ruh na ka bynta I Dr Luckyson Marbaninag I ba dei I Medical bad Health Officer bad Block Medical bad Health Officer, Riangdo CHC bad I Kong Sincerity Syilemlieh, I nongtrei ASHA na ka shnong Umthlu kaba hap hapoh jong ka Nonglang PHC. Kine ki dei kiba la ai ka jingshakri kaba bha tam jong ki na ka bynta ban pyllait im ïa kawei ka longkmie kaba ar met.
Ïa ka march pass ka nam jop la ioh rah da ka skul Anderson Higher Secondary School, bud sa ka skul Sibsingh Memorial Higher Secondary School ha ka kyrdan kaba ar. Ka la don ruh ïa jingïalehkai kynjat bor paralok hapdeng ki Ophisar sorkar bad ki Rangbah Shnong kiba dei na ka thaiñ Nongstoiñ.
La pynkut ïa ka prokram ha kane ka sngi da ka jingsam ïa jingbam sha ki nongpang jong ka Civil Hospital, ki khynnah jong ka St, Peter’s Green Pasteur Orphanage, Pyndengrei, S.Wollington Children’s Home, Nongpyndeng & Shelter Homes for Boys and Girls, Nondeiñ New Nongstoiñ.
Ha Mairang, u Bah Shakliar Warjri, u Myntri ba dei khmih ïa ka tnad Labour, Sports and Youth Affairs, u la pynher ïa ka lama lai rong jong ka Ri India bad u la shim ruh ïa ka salute na ka bynta ki 24 tylli ki parade contingents kiba kynthup ïa ki pulit, home guard, NCC, scout and guide bad ki kynnah skul ha madan ïalehkai jong ka shnong Dommawlum, Pyndengumiong Mairang.
Kiwei kiwei pat ki jingpynbyrngïa ha kane ka sngi ki kynhtup ïa ka cultural programme bad ka jingïalehkai kynjatbor phainal hapdeng ka Mawphanniew pyrshah ïa ka Kynshi bad la pynkut ïa ka prokram ha kane ka sngi da ka jingsam ïa ki khusnam.
Ha Mawshynrut Civil Sub- Division, u Bah Methodius Dkhar, MLA ka Mawshynrut Constituency u ba dei ruh u Chairman jong ka Meghalaya Transport ka Jylla, u la pynher ïa ka Lama jong ka Ri India bad u la shim ïa ka Rastriya salute jong ki 16 tylli ki parade contingent kaba kynthup ïa ki pulit bad ki khynnah skul ha madan ïalehkai jong ka shnong Riangdo.
Nalor ki prokram Sorkar, ka la don ruh ka, Cultural prokram, ka jingïalehkai kynjat bor paralok hapdeng ki ophisar sorkar bad ki nonghikai skul jong ka thaiñ Mawshynrut, ka jingsam ïa ki khusnam sha ki nongjop bad kiwei kiwei de.