Shillong, Nailar 16 : Ka KSU Employment & Monitoring Cell hynne ka sngi Balang ka la kynduh ïa u Director General ka North East Center for Technology Application and Reach (NECTAR) ba pynsngew halor ka jingujor na ka liang ka samla thep kam ha katei ka ophis.
Katkum ka kyrwoh na ka Seng la ong ba ka la don ka jingujor halor ka rukom thep kam ha katei ka ophis ba ka long ka bym ïaid beit bad bunsien kiba ïoh dei ki briew na bar jylla watla ki Khasi ki la kot ïa ka kyrdan.
La ïathuh ruh ba katkum ka advertisement ba la mih ha 09 tarik u Kyllalyngkot, 2023 bun tylli ki post ki mih na bynta ki kam bapher bapher hynrei ka rukom thep kam ka long kaba jar jar ba haduh ki nongthep kam kim ju ïoh jingtip eiei halor ka jingshah jied jong ki nongïohkam.
Na ka liang ka Seng ka la dawa ba ki kyrteng jong nongthep kam la ka long naduh kito kiba hap ha ka thup Eligible Candidates/ Shortlisted Candidates bad Selected Candidates ka dei ban paw sha pyrthei (ha ka website jong ka NECTAR) ha ryngkat ki mark khnang ba ki mark ba ki ïoh ha ki eksamin bad interview khnang ka nym don kano kano ka jingleh shiliang na ki bor pynïaid.
Ka Seng ka la dawa ruh ba nyngkong dei ban ailad shwa ïa trai jylla ban ïoh kam lada don kiba aplai.
La ïathuh ba na ka liang u Director General u la pynshai ba ki jingthung kam ka dang ïaid bad kam pat dep bad kin buh noh ha ka thup kum ba dawa ka Seng ha ka website ka jong ki bad kin ailad shuwa ïa ki paidbah Khasi lada ki la don ka kyrdan ba labiang.
