Nongstoiñ, Rymphang, 7: Ka jingthep kyrteng ha khmat u Returning Officer jong ka West Khasi Hills na ka bynta ki kyrtong ki ban ïa aireng ha kane ka Election ban wan ka ban long ha ka 27 tarik mynta u bnai ka la kut noh mynta ka sngi. Haba phai ha ki lai tylli ki constituency ha West Khasi Hills, ka Nongstoiñ ka dei kaba bun tam ki kyrtong bad haduh mynta ka sngi kiba thep kyrteng ki la poi haduh phra ngut.
Kum ban pynkynmaw ba naduh ba ka Election Commission jong ka ri India ka la shah ïa ki kyrtong ban thep kyrteng, kiba la thep naduh ba sdang ki long u bah Gabriel Wahlang na ka Congress, u bah Macmillan Byrsat na ka NPP, u bah Macmillan Kharbani na ka TMC, u bah Polestar Nongsiej na ka UDP, u bah Sanjied Kynsai Shangrit na ka HSPDP, u bah Bobby Kharshandi na ka VPP, u bah Diostarness Jyndiang na ka BJP bad u ba khatduh eh u dei u bah Stainbinel Wanñiang kum u kyrtong shimet u ba la pyndep mynta ka sngi ha ka por 3 baje nohphai sngi.
U bah Wanñiang haba ïakren bad ki ladpathai khubor hadien ba u la dep ban thep kyrteng, u la ong ba ka jingkwah jong u ban ïaleh ïa kane ka elekshon ka ïapher na kiwei pat ki kyrtong, namar naduh ba sdang u la rai halade ba un ym buh nongkitkam ne ki nongïalam hangno hangno ruh. Namar ba ki nongïalam kiba la ithuh da ka sorkar bad ki la don lypa ha ka liang jong u.
Nangta ki nongïalam ba la jied da ki paitbah kum ki sordar, ki senglongkmie, ki kynhun pahara shnong (VDP) ki Association bapher bapher ryngkat ki sengbhalang, ki don ryngkat bad ki pynshlur ruh ïa u ba un ïaleh beit ha kane ka Election bad kin ai ruh ka jingkyrshan bapura ban pynjop ïa u kumta u don ka jingsngew skhem ba un poi sha ka thong.
Haba kylli pat ba lada un jop ha kane ka election bad kano ka party un leit ban ïatreilang, u bah Wanñiang u la ong ba ïa mynta um pat lah ban ong ei ei.
Hynrei lada un jop u hap ban ïatreiang bad kano kano ka party kaba lah ban pdiang ïa ka jingangnud jong u ban don ïa ka jingsynshar kaba khuid bad ka bym noh shilliang. Nalor kata u kwah ruh ba kano kano ka party kaba un leit ban ïatreilang, ka dei ban don ïa ka thong ban thaw ïa ki lad ai kam ai jam kiba biang na ka bynta ki paitbah.
