Shillong, Risaw 11 : U President ka BJP 18 West Shillong Youth Wing uba dei ruh u President ka BJP Lumdiengjri Unit u bah William War lem bad ki nongkitkam jong kine ki kynhun ne Unit ki la rai ban phet noh na ka BJP bad da kawei ka sur ki la rai ruh ban pynduh pyndam noh ïa ka BJP Unit ha katei ka jaka.
Ki la pynpaw ba ka daw ka long ba u briew uba pynieng ka BJP u bah Ernest Mawrie u long u briew u bym biang na ka bynta kane ka constituency.
Kumba u ong 80 % ki dei kiba duk hapoh ka Constituency hynrei haba ki briew ki leit ban pan jingïarap pat na u u ai daw da kumne kumtai bad ka long kaba eh haduh katta katta ban ïa kynduh ïa u namar ba um ju don por ban don hapoh ka constituency namar u sah sha kawei pat ka shnong.
Ki la ïathuh ruh ba hadien ba ki la dep mih kin sa shim rai pat shano ban leit pynïasoh ne ai jingkyrshan ha kane ka kynti.
Kat kum ba lah ban sngewthuh ba kine ki nongïalam ka BJP ki lah ban ai ka jingkyrshan ba pura ïa u kyrtong ka UDP u bah Paul Lyngdoh ha kane ka kynti namar ki kwah ban ïoh da u briew uba tbit ban ïasaid na ka bynta ka constituency bad ka jaidbynriew hi baroh kawei.
