Pan tiket u HM barim bad saw ngut na ka UDP

Shillong, Risaw, 11: U MLA jong ka Shella Constituency u Bah Balajied Kupar Synrem bad u Myntri barim jong ka tnat Kam Pohing u Bah Horju Donkupar Roy Lyngdoh ki dei ki san ngut napdeng ki kyrtong ba la pan tiket na ka United Democratic Party (UDP) ban ïakhun ïa ka Elekshon sha ka Ingdorbar Thawaiñ ha u snem 2023.
Ïa kane la pyntip da u President jong ka UDP East Khasi Hills District u Bah Titosstarwell Chyne hadien ba la wai ka jingïalang ba kyrpang jong ka Executive Committee ha ka sngi Baar.
Ha ka jingïakren bad ki lad pathai khubor u Bah Chyne u la ïathuh ba ka District Committee ka la ïoh pdiang ïa ki kaiphod na ki Circle kaba pynpaw ba ka party ka dang khlaiñ bor ha ki 10 tylli ki Constituency.
“Na kane, ngi la ïoh pdiang ïa ki aplikeshon na ki kyrtong, ïa kiba la mynjur da ki Circle. Namarkata, ka District Election Committee (DEC) jong ka Party ka la mynjur ïa ki aplikeshon ba la phah da u MLA ka Shella u Bah Balajied Kupar Synrem, u Bah HDR Lyngdoh na Sohïong Constituency, u MDC u Bah Mitchel Wankhar na Mylliem, u Bah Olan Sing Suiñ na Mawsynram bad u Bah Anthony Kongwang na Pynursla. Ïa kine ki aplikeshon yn sa phah sha ka State Election Committee (SEC) na ka bynta ban ai ïa ka jingmynjur kaba khatduh,” u la ong.
U Bah Chyne u la ïathuh ba ki aplikeshon na ki san tylli kiwei pat ki Constituency, kata, na Mawryngkneng, Mawkynrew, Nongkrem, Sohra bad Mawphlang kim pat phah satia haduh mynta.
“Kum ki President jong ka district, ngam lah ban kam trai ba ngan ïoh ïa ka tiket hynrei ngan hap ban bud katkum ki kyndon treikam jong ka party,” u la ong.
Haba kylli, une u President jong ka UDP East Khasi Hills u la ïathuh, ïa mynta ka party kam pat lah ban shim rai eiei halor u MLA ba mynta jong ka Mawphlang Constituency u Bah Eugeneson Lyngdoh la un dang ïakhun neem ha ka Elekshon ka ban sa long, hadien ba la pynkha ïa ka shnat treikam ha kane ka Constituency.
“Ngi ladep thung ïa ki Convenor ban thaw ïa ka Circle bad kaba la ai jingmut ruh ïa ka kyrteng jong u kyrtong,” u la ong.
Haba kylli hato u Chief Adviser jong ka UDP u Bah Bindo M Lanong u la aplai neem ïa ka tiket ban ïakhun na Nongkrem Constituency, u Bah Chyne u la ong, “ngim pat ïoh pdiang satïa ïa ka aplikeshon haduh mynta.”