Ka AITC ka shu rahbor ïa ki MLA kam donhok ban kam ba ka dei ka sur u paidbah : James

0

Shillong, Risaw 10 : U nongïalam ka NPP uba dei ruh u Myntri ka tnad ka Koit ka Khiah jongka jylla u James P.K Sangma u la ther tyngeh ïa ka Liang Pyrshah ka All India Trinamool Congress (AITC) da kaba ong ba kam don hok ban kam ba ka dei ka sur u paidbah namar ka ïoh psuh khlieh ha Meghalaya tang da kaba shu rahbor ne rong tuh ïa ki katto katne ngut ki MLA jong ka jylla.
“ Khlem da ïaleh ïa ka election ne ïoh ka jingkyrshan na ki paidbah, ka la shu wan bad rong tuh ïa ki MLA bad sdang ban ïoh ïuh kjat ha ka jylla kam mut ba ki lah ban kam ba ki ïoh ka jingkyrshan na ki paidbah bad ba ki ïeng na ka bynta ki paidbah. Dei ha ka election keiñ ban ïa pyni bad ïa peit ïa kata ka sur u paidbah” ong u James Sangma.
ïa kane u la kren pyrshah ïa ki jingïai kynnoh ba la mih na ka AITC pyrshah ïa ka sorkar MDA ba la ïalam da ka NPP kiba khlem nongrim suda.
Ka AITC ka la don haka Liang Pyrshah hadien ba ki 12 ngut ki MLA jongka Congress ki la pynïasoh sha ka bad mynta kumba paw na ki dak ki shin ki ban neh bad ka kin don sa tang 10 ngut kata ruh lada ym don shuh ba kynthih diengkper shwa ka election.
Halor ki jingkynoh bamsap jongka AITC ïa ka sorkar MDA u Sangma u la ong ba ki briew kiba im ha ki ïing paki dulan kim dei ban kawang maw ïa ki iing jong kiwei ki briew. U la ong ba kine kiba don haka Liang Pyrshah ki dei kijuh ki briew kiba don ha ka sorkar ha ki por ba mynshwa.
“ Ki la don bun ki jingkynnoh pyrshah ïaki ruh bad ki ruh ki dei ban jubab hakhmat ki paidbah halor ki jingkynnoh ym dei ban shu kawang maw ne kdew kti tang ïa kiwei bad kata ruh da ki jingkynnoh ba khlem nongrim bad kane ka long kaba bakla shi katdei eh” ong biang u James.
U la ong ruh ka jingkob ïatai nia jong uta u nongpathai khubor ka AITC u Saket Gokhale kam long ka bym donkam. U la ong ba u Myntri Rangbah u la dep pynshai ba lada ma u bad ki myntri jongu kin shu lap miet ïa ka jingïatainia bym don nongrim te mano pat ban treikam ha Secretariat.
“ Ngi sngew tynnad ïa ka jingsngew khia jongu Gokhale, u don ka hok ban pynpaw ïa ki jingsngew jongu hynrei ban kob ïatai nia ïa u Myntri Rangbah bad Symbud Myntri Rangbah kam don jingmut namar lada u kwah ban wan ïakynduh ïa ki ki long kiba kloi ban ïa kynduh ha ophis treikam jongki . Wat ïa ki lad pathai khubor kiba dei ki paia ba saw ha ka synshar paidbah ki kloi ban iakynduh bad jubab ha kano kano ka por ruh namar ki jubab ba phi kylli bad ka jubab ba ki ai ka dei beit na ka bynta ki paidbah” ong biang u Myntri ka koit ka khiah.
Halor ka jingwan rung ka AITC sha ka jylla ha kane ka kynti u James u la ong ba ki paidbah ki dei ki briew kiba stad eh ban rai la kin pdiang ne kyntait ïa ka AITC ngin sa ïohi ha u 2023.

Leave A Reply

Your email address will not be published.