Shillong, K’lyngkot 25: Ka Seng VPP ka la phah da ka jingthoh sha ka sorkar ban kyntu ba kadei ban pynbiang ïa ki Centre ban toh eksam ki khynnah kiba hap ban ïaleh ia ka eksam Common University Entrance Test (CUET).
Ha ka shithi la ong ba namar ba ka sorkar ka la pdiang ban pyntreikam noh naduh mynta u snem ïa ka CUET na ka bynta kito ki samla pule kiba leit ïa ka Under Graduate bad ka Post Graduate, ka dei ban pynbiang ia ki jaka ialeh eksam, ym dei ba ki samla ki hap ban leit ïaleh eksam shabar.
U Bah Ardent haba kren ha ka jingïalang mynta ka janmiet ha YMCA Mawkhar, u la ong ba lada ki samla jong ngi kim ïoh lad ban thoh eksam hapoh la ka jong ka jylla, khlem pep kin bun ki ban pep skul noh shiteng por.
Sa kawei pat ka shithi ba ka Seng ka la thoh sha ka Myntri ka koit ka khiah, ka Dr. Ampareen Lyngdoh kadei halor ka jingbym pat pyllait ïa ka Stipend jong ki Samla kiba leit pule Doktor, ïa kaba ka Seng ka la kyntu ïa ka Myntri ban pyllait noh, khnang ba ki Samla pule kin nym mad jingeh.
Ha kajuh ka por ka Seng ka kyntu ïa ka sorkar ban pynbeit thymmai noh ïa ka Stipen jong kito kiba leit pule shabar jylla, namar ka sorkar ka buh ha ki lai tylli ki kyrdan, kata ka Tier I, Tier 2 bad ka Tier 3, katkum ka jinglong ki nongbah bad ki jaka ba ki pule. Kumta kan bha shibun ruh lada pynbeit thymmai ïa kane.
