Mawkyrwat, Jymmang 29 : Kawei ka met ka la per ha sla um ha ki bynta ba kham harum jong ka Wah Ummngi, suba ba lah ban dei ka met jong u bah Sainkupar Lyngkhoi, 22 uba la hap bad ngam jyllop ha wah Umngi naduh ka 25 tarik u Jymmang, 2025.
Katkum ka tyllong khubor ba la ïoh lum na ki paidbah, la ong ba mynta ka sngi ka 29 tarik u Jymmang, 2025 la ïohi ïa kawei ka met kaba la per ha sla um bad la suba jur ruh ba ka dei beit ka met jong u Sainkupar Lyngkhoi na ka shnong Lawblei hynrei na ka daw jong ka jingheh palat ka um kumta ym pat lah ban sei sha ryngkew ïa ka met jong u.
Kum ka jingpynkynmaw, u bah Sainkupar Lyngkhoi u la hap bad ngam jyllop ha wah Umngi ka dei naduh ka janmiet jong ka 25 tarik u Jymmang, 2025 kaba dei ka Sngi U Blei ha ka por ba u dang leit toh doh ryngkat bad ki 3 ngut ki para shnong. Shuh shuh ha ka 28 tarik mynta u bnai pat na ka liang ki paidbah ka shnong Lawblei kiba leit wad ïa u, ym tang kata ki la ïoh ban ring dur ïa kawei ka met iap ba ka la per ha sla um.
Ki la suba ba ka dei ka met ïap jong u Rangbah ba la ngam jyllop hynrei kaba eh ïa ki ka long ba kim shym la lah ban sei dei na ka daw jong ka jingkhlaiñ bad jingheh jong ka um bad artad ka dei ruh ha ki jaka ba long riat sham sham.
Ki tyllong khubor ka la ïathuh shuh shuh ba namar ka jingjur pat jong ka jingwan u slap, hynnin ka miet jong ka 28 tarik mynta u bnai ka um ka la rong biang ïa katei ka met sha kawei ka kshiad Sympyllieng kaba dei kawei na ki kshaid kaba jrong bad ka met ka sah kut ha tbian jong katei ka wah.
Ha kawei pat ka khubor, la ong ba na ka liang jong ka kynhun SRTs na Shillong bad F&ES na Mawkyrwat ruh kim shym la shong thait hynrei ki la ïai pyrshang katlah i bor jong ki hynrei kim pat lah ban sei ïa ka met namar ka dei ka jaka kaba eh bha.
