Dawa ka CoMSO bad GSMC ban sospon ïa ki DEO ba kynnoh donkti sam thok ïa ki job card
Shillong, Jymmang 29 : Ka Confederation of Meghalaya Social Organisations (CoMSO) bad ka Garoland State Movement Committee (GSMC) ki la dawa ba dei ban sospon mardor ïa ki saw ngut ki Data Entry Operator namar ka jingdonkti jong ki ha ki kam leh thok ha ka jingai ïa ki job card ha ka skim Mahatma Gandhi National Rural Employment Guarantee Act (MGNREGA) kaba hap ha Demdema Block, West Garo Hills bad ruh ban phah leit pynshisha man ka iing ha baroh kito ki shnong kiba shah ktah ban pynduh lut ïa ki job card ba la shu ai thok.
Ïa kane ka jingdawa la pynsngew ha ka jingïalang kaba la pynlong da u Sub-Divisional Officer (SDO) ka Dadenggre Civil Sub Division ha Demdema Block ha kane ka sngi Balang hadien ba la don ka jingujor ha ophis u Deputy Commissioner West Garo Hills pyrshah ïa ka jingleh thok ha ka jingai ia ki job card ba ïadei bad ka skim 100 sngi.
Related Posts
Ha kane ka jingïalang la wan ban shim bynta lang uh naduh ki ophisar ba dei peit kynthup ïa u Block Development Officer (BDO) ka Demdema, Assistant Programme Officer (APO), Assistant APO, ki nongtrei bda ki nongïalam ka CoMSO bad GSMC.
“Ha ka jingïalang, baroh ki nongïalam ka CoMSO bad GSMC ki la banjur tyngeh ïa u SDO bad BDO ban shim ïa ki lad pynshitom kiba tyngeh ïa ki saw ngut ki DEO kiba donkti. Ngi dawa ba dei ban sospon mardor bad ban sdang ka jingpynshisha man la ka iing sha baroh kito ki shnong kiba shah ktah khnang ban yn lah ban weng noh ïa ki job card ba la shu ai thok,” ong ka kyrwoh ba la phah lang da ka CoMSO bad ka GSMC ha ka sngi Palei.
La ïathuh ba na ka liang u SDO ka Dadenggre u la kular ban leh da kaba tyngeh bad ruh ban sospon ïa ki DEO ba shah kynnoh donkti ha katei ka kam.