Pdiang ka KSU ïa ka shithi khot ïa kren ka sorkar halor ki 5 tylli ki mat jingdawa

Shillong, Nailar 25: Ka Khasi Student Union (KSU) hadien ka jingiakynduh jong ka Central Executive Committee (CEC) mynta ka janmiet kila rai ban pdiang ïa ka shithi khot ïa kren ka sorkar jylla ka ban long ha ka 26 tarik u Nailar ha ka por 6 baje janmiet.
Na ka liang u Samla Pynshai Kupar Dkhar uba dei u Information & Publicity Secretary, KSU Central Executive Council u la pyntip ba hadien ba ka seng kala ioh ïa ka shithi na ka sorkar ban khot ïa kren halor ki san tylli ki mat jingdawa ba ka seng kala buh ha khmat ka sorkar.
Ka seng ka khmih lynti ba ka jingïakynduh kan long kaba seisoh.
Kane ka jingkhot ïa kren jong ka sorkar ïa ka KSU kadei hadien ba la mih ka jingklumar na ka rally thuk thuk kaba la wanrah ïa ka jingshah thombor ïa ki briew kiba ïaid lynti bad kumjuh ruh ka jingshah pynjulor jong ki kali shimet bad jong ka sorkar ruh kumjuh.
“Ka KSU kan leit sha ka jingiakren bad ka Sorkar lashai ka Sngi ban ïa kren ïa ki 5 tylli ki mat jingdawa kiba ka seng ka la buh ha khmat jong ka sorkar na ka bynta ka jingmyntoi ka Jaidbynriew bad ka Jylla hi baroh kawei” ong u samla Pynshaiborlang Rani.
Shuh shuh u la ong haba ka Sorkar ka khot ïa kren, ngi khlem khim jingmut ban ïa pynbeit ïa ki mat jingdawa, hynrei lada ka jingïakren kam long kiba seisoh, ka KSU kan pynjur ïa ki jingiakhih.
Katkum ka shithi na ka sorkar ba la phah sha u Samla Pynshaiborlang Rani uba dei u Assistant General Secretary KSU seng kmie ka sorkar kala pynbeit ba kane ka jingïalang kan long mynta ka sngi ka 26 tarik u Nailar ha Conference hall jong ka Secretariat.
Ïa kane ka shithi na ka liang jong ka sorkar la phah da u Joint Secretary jong ka sorkar Meghalaya lyngba u Bah DD Syngai, MCS.
Ki san tylli ki mat jingdawa ka KSU ki kynthup ïa ka jingdawa pynshitom ïa u Deputy Commissioner, Superintendent of Police, ki Heh Pulit bad ki nongtrei ka MSPCB namar ka jingkhang ïa ki paidbah ban leit ïa shim bynta ha ka public hearing ka Shree Cement ha East Jaintia Hills ba long ha ka 31 tarik Naitung.
Kiwei pat ki mat dawa ki dei ka jingpyntreikam pura ïa ka Meghalaya Residents Safety and Security Act, 2016 haduh ban da pyntreikam ïa ka Inner Line Permit, pynieng ïa ki facilitation centre ha baroh ki18 tylli ki entry point ha ri-lum Khasi bad Jaintia ryngkat ka jingpynshisha da ki Dorbar Shnong, pyntreikamm ïa ka Migrant Workmen Act, 2020 bala pynkylla, pynkylla thymmai ïa ka thungkam thungkam ha NEIGRIHMS kynthup ka ratio ba 80:20 ïa ki nos kynthei-shynrang, bad ai bhah ïa ki trai shnong, bad weng noh ïa ki interview ha ka thungkam ïa ki kam Grade B,C bad D nalor ban don ka SoP ha baroh ki Recruitment Board.