Ka sorkar kam ju ïaid nadien haba rai ïa kino kino ki kam khlem da ka kynjoh ktien ïa ki nongïalam shnong: Conrad

Shillong, Nailar 25: U Myntri Rangbah ka Jylla u Conrad K Sangma haba jubab ïa ka jingïatania kaba lyngkot hapoh ka dorbar Synrai da kaba pynphai nia ïa ka Liang Pyrshah ka Voice of the People Party (VPP) halor ka kam ïada khyndew, haba bthah ïa kane ka party kaba synshar ha Khasi Hills Autonomous District Council (KHADC) ban pynïadonbynta lang ïa ki Dorbar Shnong ha ka aiñ Khyndew jong ka kaba dang shu dep ban mynjur dangshen da ka Dorbar KHADC.
Haba jubab ïa ka jingïatainia ba la wanrah da u President ka VPP u Bah Ardent Miller Basaiawmoit uba dei ruh u MLA ka Nongkrem, u Conrad ula ong ba ka Sorkar jong u kam ju ïaid lait ïa ki kyndon ba la buh.
U la ong, “Ka Sorkar ka ju pynneh beit ïa ka jingleh ryntih. Kam pat ju don ka khep ba ngin leh da ka bor ha kano kano ka bynta. Kam pat ju don ka khep ba ngi la ïaid na ka jingkhang dien na ka bynta ban thied jaka. Baroh la leh katkum ki kyndon ba ïatip lut baroh.”
U Myntri Rangbah ula ong ba u mynjur bad ki jingkdew u President ka VPP ba ka jingïasyllok bad ki shnong ki thaw ka long kaba donkam haba shim ïa kano kano ka rai ba ïadei bad ka khyndew ka shyiap, hynrei u ong ba ïa kane ka juh ka nongrim pat la pynkheiñ da ka KHADC.
Haba kren ïa ka KHADC Regulation and Registration of Land (Amendment) Bill, 2026, u Conrad ula ong ba kane ka Bill ka thmu ban wengnoh ïa ka kyndon ba kongsan bha-kata ban ïasyllok bad ki nongialam shnong kum ki Dorbar Shnong, Dorbar Raid, bad ki Hima.
“Ka clause ha ka kyndon 16 kaba ong ba ïa ka kyndon 16 jong ka principal act ka kyntien “after prior consultation with respective Dorbar Shnong, Dorbar Raid bad Dorbar Hima, appearing after the word ‘Executive Committee’ shall be deleted” kaba mut ba hadien ka jingïasyllok bad ki Dorbar Shnong, Dorbar Raid bad Dorbar Hima, hadien ka kyntien “Executive Committee” dei ban pyndam noh,” bynrap u Conrad.
Haba shim ïa kane ka sienjam kum ka kam kaba sngewkhia, u Conrad ula ong, “Kane ka ïaid pyrshah pura ïa ka nongrim kaba la pynpaw ha ka jingïatai mynta ka sngi. Ha kawei ka liang ngi ong ba dei ban shim ïa ka jingpynsngew ki Dorbar Shnong, katba ha KHADC pat ïa kane kajuh ka Act la pynkylla bad weng ïa ki Dorbar Shnong, weng ïa ki Raid bad kumjuh ruh ïa ki Dorbar Hima na ki kam ïasyllok ha ka kam ïadie ïathied jaka”.
U Conrad ula ong ba ki Dorbar Shnong, Raid bad Hima ki dei kiba la thaw da ki Kpa Tymmen ba kin long kum ki nongpeit bniah bad tehlakam ïa kiei kiei baroh.
U la ong, “Ki Kpa tymmen ki don ïa katei ka jingïohi jngai, na kata ka daw ngi don ïa ki Rangbah Shnong, ngi don ïa ki Raid bad ki Hima ba kin pynthikna ïa ka jingpeit thuh bad tehlakam ïa kiei kiei baroh ha ka rukom synshar khadar tynrai, kaba la ïabud da ki phew snem bad spah snem.”
“Namar kata, nga kwah ban buh ïa kane ka jingdawa sha ka VPP. Nga kwah ban buh ïa ka mat jingdawa jong nga sha ka KHADC bad bthah ïa ki ban sngewbha leh ïa kaei kaba phi ïalap bad sngewbha pynïadon bynta lang ïa ki Dorbar Shnong, Raid bad Hima, sngewbha pynthikna ba ki Shnong ki thaw kim dei ban shah ieh shadien,” u la ong.
Ula ong ba ka Sorkar ka kyrshan pura ïa ka jingïashim bynta lang ki shnong ki thaw ha ki kam jaka puta bad kyntu ïa ka KHADC ba kan bat lang ïa kane.