Pdiang ka HPC ïa ka Blue Print ka sorkar halor ka jingpynkynriah ïa ki Harijan na Them Iew Mawlong

Shillong, Jylliew 07: Ka Harijan Panchayat Committee (HPC) ha ka sngi balang ka la pyntip ha ka Ïingbishar High Court of Meghalaya ba ka la pdiang ïa ka Blue Print ba ka sorkar ka tyrwa ka sorkar na bynta ban pynkynriah ïa ki 342 tylli ki longïing jong ki Harijan kiba shong ha Them Ïew Mawlong sha ka jaka ba ju don ka ophis ka Shillong Municipal Board (SMB).
Ha ka hukum ba la pynmih ha ka sngi Balang ka kashari jong ki arngut ki nongbishar u Chief Justice ka HC u Justice Sanjib Banerjee bad u Justice W Diengdoh ka la ong, “Na ka liang u Learned Advocate-General u la pyntip ba u la ïoh ïa ka kaiphot na u nongïasaid aiñ ka Harijan Panchayat Committee ba ka HPC ka la mynjur halor ki nongrim (in principle) ïa ka blueprint ba ka sorkar ka la pynkhreh bad la pyntip ruh ba ki don katto katne ki jingpynkylla thymmai kat kum ka jingai jingmut ha ki katto katne ki bynta”.
“Namar ka sorkar jylla ka dang peit sani ïa ki jingai jingmut ban pynkylla, kane ka jingshim bishar kan long biang hadien lai taïew bad kyrmen ba kane ka mat kaba sah teng la slem yn lah ban pynkut noh,” ong shuh shuh ka hukum.
Ïa kane ka mokotduma ka kashari kan shim bishar biang ha ka 3 tarik Naitung 2023.
Haba u Mawphor u ïakren bad u Secretary ka HPC u Gurjit Singh na ka liang jong u u la pynpaw ba um pat lah ban aithuh kiei ki jingpynkylla ha ka Blue Print.
“Ngam pat ïoh ban ïakren bad u nongsaid aiñ jong ngi ïoh kan don ka jingiatyngkhuh bad ka jingbishar ka HC ngam pat lah ban ong eiei ïa mynta bad na ka liang jong nga ruh nga dang shu ïoh ïa ka hukum mynta mynta nga dang hap ban pule shuwa ban kynthoh eiei,” u la ong.
Lah ban kdew hangne ba ka Sorkar Jylla ka la wanrah ïa ka blueprint hynrei ka Harijan Panchayat Committee ka la kyntait ïa kane bad ka la pan 200 square meter ka jaka sha kawei pa kawei ka Longïing ki 342 tylli ki Ïing hapoh ka European Ward nalor ban pynlut ruh ïa ka bai shna ïing.
Ha ka 31 tarik Nailar, 2022, ka Sorkar ka la pynbna ïa ka rai ban shna ïa ki ïing bun mala ha ka jaka bah eh 2.5 acre, kaba dei jong ka Shillong Municipal Board (SMB) na ka bynta ban pynkynriah ïa kine ki 342 tylli ki Longïing na Them Metor.
Lah ban kdew hangne ba ka Harijan Panchayat Committee (HPC) kala kyntait kham hashuwa ïa ka blueprint jong ka Sorkar Jylla.
Ha ka jubab ba 6 sla ba la phah sha u Deputy Secretary ka Sorkar Jylla bad kiwei kiwei ki Tnad Sorkar, ka HPC ka la kynnoh ba ka jingtyrwa jong ka Sorkar ka dei ka bym pat biang pura, ka bym ïahap, ka bym long bad kaba beiriti.