Ba pynkheiñ kyndon por election weng ka sorkar ïa ka kong Phidalia na shuki Chairperson ka MSCW

Dang shong thylli ka shuki Chairperson Women Commission haduh mynta

0

Shillong, Jylliew 07: U myntri ka tnat Social Welfare bah Paul Lyngdoh mynta ka sngi Balang, ula pyntip ba ka Sorkar Jylla kala weng ïa ka Kong Phidalia Toi kum ka Chairperson ka Meghalaya State Commission for Women (MSCW) namar ka jingpynkheiñ ïa ki kyndon jong ka Meghalaya State Commission for Women Act, 2005.
U Bah Paul u ïathuh ba ka Kong Phidalia Toi ka dei ban leit ïashimbynta haduh lai tylli ki jingïalang jong ka Commission kat kum ki kyndon hynrei kane ka Longkmie kala pep haduh saw tylli ki jingïalang bad leit ïashimbynta ruh ha ka jingïalap elekshon ïa u kyrtong ka NPP na Jowai, u ma Wailadmiki Shylla ha ka elekshon MLA ba dang shu dep.
“Nga la pule bniah ïa ka File. Ka Chaiperson barim ym tang baka shim bynta haka jingïalap ilekshon hynrei kala dei ruh ban leit shim bynta haduh lai tylli ki jingïalang hynrei kala pep ha baroh saw tylli ki jingïalang bad dei namar kane kam shym la long kaba tbit ban shimti biang kum ka Chairperson jong ka MSCW” la ong u bah Paul.
U Bah Paul u la ïathuh ruh ba ka Sorkar kam pat thung Chairperson thymmai satia namar kan hap ban phikir bha haba ïadei bad ka jingjied ïaka briew namar kane ka jingjia jong ka kong Phidalia.
“Ngi donkam ban wad da ki briew ki ban shakri hok ïa ka Women Commission namar kadei ka tnat treikam kaba donkam bha bad dei namar kane donkam hi daka briew kaba don shisha ka jingmut ban trei ïaka kam kumba la bynshet” ula ong.
Haba kylli u bah Paul ula ong ba shen ka sorkar kan sa wanrah ïaka thup kyrteng jong ki briew bad hadien kane un sa ïakren bad u myntri rangbah ka jylla ban ïathir halor ki briew ki ban shimti thymmai kum ka Chairperson jong ka Commission.
U bah Paul ula mynjur baka jingthung Chairperson kam dei ban long tang lada ka briew ka don jingïadei bad kino kino ki sengsaiñ pyrthei.
“Wat ju khuslai namar nga kwah hi ba ka briew ka ban shimti kum ka Chairperson jong ka Commission kan dei kaba tbit, nga jied ïa kiba tbit kiba lah ban trei ïaka kam ym kino kino kiba don bynta ne don jingïadei bad kiba don haka bor ne bad kino kino ki sengsaiñ pyrthei” ula ong.
Nalor kane u myntri ka tnat Social Welfare u bah Paul Lyngdoh ula pyntip baka sorkar kala weng kam ïaka kong Phidalia Toi kum ka Chairperson jong ka Meghalaya State Commission for Women (MSCW) namar kala pynkheiñ ïaka Meghalaya State Commission for Women Act, 2005.
U bah Paul ula ïathuh ba nalor ba ka kong Phidalia kala pynkheiñ ïa ka Meghalaya State Commission for Women Act, 2005 daka ba leit shim bynta ban ïalap ilekshon ïa u MLA ka Jowai u bah Wailadmiki Shylla, kala pep ruh ïaki jingialang jong ka Commission haduh saw sien.

Leave A Reply

Your email address will not be published.