Mawkyrwat, K’lyngkot, 24: Ka United Democratic Party (UDP) jong ka Mawkyrwat Circle mynta ka sngi ka la ïoh ban pdiang burom ïa u bah Renikton Lyngdoh Tongkhar ba un long u dkhot bad khamtam eh ba un long u kyrtong ba pura jong ka United Democratic Party (UDP) jong ka Mawkyrwat Constituency ha ka jingïalang ba la pynlong ha phyllaw jong ka ophis treikam jong ka party.
Ha kane ka sngi la ïoh ruh ban pynsngew ïa ki jingtreikam ba lyngkot hapoh ki snem kata na u bah S.K. Budnah, Secretary ka UDP Mawkyrwat Circle, na ka President ka UDP Women’s Wing, kong Shidalin Marngar, bad na ka General Secretary ka Election Committee, u bah Y.G. Lyngdoh.
Ha kajuh hi ka sngi ka la don ruh ka jingïaphylliew kumno ba pynkhlaiñ ïa ki jingtreikam hapoh jong ka party UDP bad ka jingpynithuh ruh ïa ka RPI ba ka long kawei na ki party ba wan kyrshan ïa ka UDP.
Haba kren ha ka jingïalang, u bah Renikton Lyngdoh Tongkhar kum u kyrtong jong ka United Democratic Party (UDP) na ka Mawkyrwat Constituency uba dang shu shah pdiang thymmai u la pynpaw ka jingaikhublei ïa ki nongïalam jong ka UDP kiba la pdiang sngewbha ïa u ba long ruh u kyrtong ka UDP na ka Mawkyrwat Constituency ha kaba kan long ka jingkyrmen ïa ka ban sa wan.
U la ong ruh ba ban wanrah ka jingïajan hapdeng ki para nongtrei ha ki rukom treikam kaba donkam ka long ïa ka jingïatreilang ryngkat ka jingïasngewthuh jingmut bad ha ka juh ka por u la ai ruh ki jingbatai halor ka jingmut ban long ki nongïalam ba ki dei ban don ka jingsngewrit, bad ka jinglong ba bha ki ban trei napoh napoh ïa ka kam.
U bah Shainkor Nongsiej, President ka UDP Mawkyrwat Circle uba la pynïaid ïa ka jingïalang bad u bah Dominic Shang-pliang, Working President ka UDP Mawkyrwat Circle u la ai ka jingkren khublei.
