Nongstoiñ, K’lyngkot 24: Ki paidbah ka thaiñ Mawshynrut baroh kawei, ki la pynkynmaw biang na u MLA/MDC jong ka thaiñ u Bah Gigur Myrthong, ban pynurlong noh ïa ka Mawshynrut Civil Sub Division ba pura, kumba la ju angnud bad ap khmih lynti da ki paidbah nongshong shnong baroh shikatta. Hynrei, mynta ka por jong u ruh la kut ki kam ruh ym poi shano shano.
Lah ban pynkynmaw ba ha u jylliew jong u snem 2020, ki nongïalam ka KSU Mawshynrut lyngba ka sur jong ki paidbah, ki la pynkynmaw hakhmat u nongmihkhmat ryngkat bad ka memorandum halor ka jingangnud jong ki paidbah ka thaiñ.
Ka mat ba hakhmat ka dei khamtam bad ka roi ka par bad ka kyrdan longrynieng jong ka thaiñ Mawshynrut, kaba watla ka la ïoh ïa ka Civil Sub Division la katto katne snem mynta, pynban ym pat don jingkylla ei ei wat tang khyndiat ruh hynrei ka dang ïaineh sah kumjuh.
Lah ban kdew ba ka seng lyngba ka jingthoh, ka la ïoh ban pynkynmaw ba lah dei ban pyntreikam noh pura ïa ka Civil Sub Division da kaba wanrah noh ïa ki tnad treikam bapher bapher, khnang ban kyntiew ïa ka ïoh ka kot bad ka roi ka par.
La donkam kyrkieh ruh ban pynkiew noh ïa ki jingthiah ki nongpang ha Riangdo CHC. Ban wanrah bad thung noh ïa u SDMO, nangta ban wanrah noh ïa ki Specialist ban sumar ïa ki khunlung bad longkmie (pediatric & gynecologist).
La donkam wanrah noh ïa ki tiar sumar nongpang kum ki X-Ray bad Ultrasound Machine, ban pynkiew ïa ki jingdon jong ki Nurse bad ki nongtrei ha ka jaka sumar, khnang ban lah ban ai ka jingshakri ka janai sha ki paidbah. Namar ka Mawshynrut Civil Sub Division ka la long ka jaka ba kham ïar bad ka nang bun bad nang kiew ka jingbun ki paid nongshong shnong.
Nalor kine ki mat ba kham kongsan, ka seng ka la pynpaw ruh ïa kiwei kiwei ki mat kiba ïa dei bad ka bha ka miat bad ka roi ka par jong ki paidbah nongshong shnong ka thaiñ. Ka seng ka da kyrmen skhem ba u Bah Gigur Myrthong kum u nongmihkhmat sha ïing dorbar thawaiñ ha ka liang synshar bad kum u nongmihkhmat sha District Council kum u Dy CEM, u don ha ka bor bad lah ban leh shibun kiei kiei na ka bynta ki paidbah ka thaiñ.
Lah ban pynkynmaw ba na ka liang u Bah Gigur Myrthong haba pdiang ïa ka jingdawa jong ka seng, u la pynpaw ba un sa shimkhia bad ban pyni da ki kam halor ka mat kaba ïadei bad ka bha ka miat jong ki paidbah nongshong shnong. Namarkata, na ka liang ki paidbah ki kwah ba un jubab noh mynta shwa ka elekshon MLA 2023.
