Pdiang burom ka Raidmynsaw Sec. School ïa ki saw ngut ki nonghikai ba thymmai

0

Nongstoiñ, Jymmang 21: Ka Raidmynsaw Secondary School ka dei kaba la seng da ki riew rangbah jong ki shnong bapher bapher na ka thaiñ Langpih dang ha u snem 2017 hynrei ka la kiew sted bha ha baroh ki liang. Dang ha ka sngi thohdieng ba la dep ka Managing Committee jong katei ka skul ka la pynlong ïa ka jingïalang ba lyngkot, ban pdiang burom ïa ki saw ngut ki nonghikai kiba dang wan rung thymmai na ka bynta ban hikai ha katei ka skul.
Kitei ki saw ngut ki nonghikai ba thymmai ki dei u babu Pynkupbor L.Mawnai kum u Headmaster, u babu Hambokjohn Lyngdoh, u babu Bhaboklang Marweiñ bad ka Miss Peacefulness Merry Rashir.
Ka jingïoh jong katei ka skul ïa ki saw ngut ki nonghikai ba thymmai kiba la biang pura ka kyrdan pule katkum ba la pynbeit da ka sorkar, ka la long ka jingkyrkhu kaba khraw ym tang ïa ki khynnah skul, hynrei wat ïa ki paitbah nongshong shnong jong katei ka thaiñ kaba don hapdeng ka jingeh bad ka jingsahdien ha baroh ki liang.
Ha katei ka sngi la pynïaid ïa ka jingïalang da u bah Hindro Samakha Chairman ka managing Committee, ha kaba baroh ki dkhot jong ka M/C ki la ïadon lang ryngkat ki khynnah skul bad ki nonghikai jong ka Upper Primary School laem bad ki riew rangbah jong ka shnong.
Ha shuwa ba ki nonghikai kin pynithuh sha ki khynnah skul, la ïoh ïa ka jingkren lyngkot na u bah Samakha ha kaba u la pynpaw ka jingsngewnguh ïa kitei ki nonghikai kiba la kloi ban wan shimti ïa ka kam, wat la ki tip ba katei ka skul ka dei kaba dap tang da ki jingïakajia, namar ka jingïatyngkhuh bad ka sorkar Assam hynrei kim shym la kheiñ ïa kata.
U la ong ruh ba kum ki nonghikai kim dei ban sheptieng lada don kino kino ki jingïatyngkhuh bad ki bor sorkar na Assam, namar ki paitbah kin ym iehnoh hynrei kin don ha syndah jong ki. U bah Samakha u la pynshai bad ai khubei kyrpang ïa ki ophisar sorkar naduh ka kong L.Syiemlieh Sub Divisional of School Education Officer West Khasi Hills, haduh ki Ophisar jong ka Directorate bad ïa ka sorkar pdeng, kaba la bei pisa haduh shi klur lai phew wei lak tyngka lyngba ka Rashtriya Madhamik Shiksha Abhyan, na ka bynta ban shna ïa ka ïingskul kaba thymmai bad kaba yn sa sdang noh shen.
Nalor kata u la ai khublei ruh ïa u bah K.P.Pangñiang MLA barim u ba la trei shitom met bad mynsiem ban pynrung ïa ka kyrteng jong katei ka skul bad lyngba ka jingtrei shitom jong u ba ka sorkar ka la phai khmat bad pynïoh ïa katei ka skhim.
Nalor kata u la pynshai ruh ba u bah Pangñiang u la kular ban trei shitom na ka bynta ban pynïoh sa ïa ka mang pisa na ka bynta ban tei ïa ki jaka sah jong ki nonghikai jong katei ka skul, khnang ban pynsuk ïa ki nonghikai. U la ong ruh ba naduh mynta ïa katei ka skul yn tip noh kum ka Raidmynsaw RMSA Secondary School.

Leave A Reply

Your email address will not be published.