Paw ki samla ka jylla ha ka jingïakop pynher kali ha ka 4th Street King’s Autocross Challenge 2023 ha Nagaland Nongpoh, Jymmang 01 : Ki samla ñiah kali naka jylla Meghalaya kila paw bad khur bun tylli ki khusnam haka jingïakop pynher kali bala tip kum ka 4th Street King’s Autocross Challenge 2023 kaba la long dang shen ha jylla Nagaland. Katei ka jingïakop pynher kali ka dei ruh kawei naki jingïakop ba heh haka thaiñ Shatei Lam mihngi ha kaba la wan ruh ban shim bynta palat 91 ngut ki nongñiah kali ba paw naki jylla bapher bapher ka thaiñ Shatei Lam Mihngi, ryngkat ka jingangnud ban wanrah ka jingïatylli hapdeng ka jingïadei jong ki jylla ka thaiñ Shatei Lam mihngi jong ka ri India. Ki nongjop ha katei ka lympung ki kynthup ïa u Bazely Rymbai u ba la khur ïaka kyrdan ba nyngkong haka open Category, u Elhannan Jason Syiem haka kyrdan ba nyngkong jong ka Rookie Category, u Samla Isynei Hinge haka kyrdan kaba ar. Haka liang ki kynthei ka samla Chelsea Byrsat kala khur ïaka kyrdan ba nyngkong bad ka Noche Aranchimiksa Sangma haka kyrdan ba lai, katba haka SUV Mens Category u Larry Mukhim u ka khur ïaka kyrdan ba ar bad u Ruchir Marak haka kyrdan ba lai bad ïaka khusnam kyrpang Best Decorated Car la rah da u Samla Jaki Trang bad naka liang kitei ki nongjop kila khur ruh ïaki khusnam pisa bad ki trophy.