Ka elekshon ha Sohïong Constituency ka la shongshit puk mynta namar ka sah satang khyndai sngi ban poi ka sngi thep vote, ka sngi ba ki paidbah kane ka Constituency kin ïoh ban jied ïa u nongmihkhmat sha ïingdorbar Thawaiñ ka jylla, hadien ar bnai ba kiwei pat ki 59 tylli ki Constituency ki ladep ban jied ïa ki MLA jong ki.
Ki don hynriew ngut ki kyrtong kiba la mih ban ïa aireng ha kane ka lympung. Kita ki long u Bah Samlin Malngiang, Ex MLA uba mynta u la ïakhun na ka NPP ym shuh na ka HSPDP laba u la jop ha u 2018. Nangta u Bah Synshar Lyngdoh, u Khun pyrsa jong u MLA barim, u Bah HDR Lyngdoh, uba mih ïakhun na ka UDP. U Bah S. Osborne Kharjana, u kyrtong ka Seng Congress, u Bah Sandondor Ryntathiang, u kyrtong ka HSPDP, u Bah Stodingstar Thabah kyrtong ka Trinamool Congress bad u Bah Seraph Eric Kharbuki.
Kumba beh ka lyer hi mynta ka jingïakhun kan long hapdeng u kyrtong ka NPP, u kyrtong ka UDP bad u kyrtong ka Congress. Kiwei kiwei ki kyrtong imat kin shu long tang kum ki nongïakhun ban pynbun kyrtong ha kane ka lympung. Na kine ki lai ngut, ka Campaign imat ka kham shongshit hapdeng u Bah Samlin bad u Bah Synshar, ki arngut ki paralok kiba la ïeng rynsan lang ha u 2018 pyrshah ïa u (L) Bah HDR Lyngdoh. Hynrei mynta ki la ïeng pyrshah uwei ïa uwei. U Kyrtong ka Congress u Bah Osborne Kharjana u la kham jai jai bad um da pynpaw paidbah than ne lum ïa ki jingïalang paidbah.
Hynrei kaei kaba ki paidbah na shabar ka Constituency ki ïakren kam dei halor u kyrtong u ban jop, hynrei kaba ki kham ïakren ka long halor ka rukom ïalap elekshon. Naduh shuwa ban khlad u Bah HDR Lyngdoh ruh, ka Sohïong ka la long ka phang pdeng jong ki lad pathai khubor ha ka jingïalap elekshon, namar ka jingïabeiñ ïakhoh bad ka jingïabang nia ki katto katne ki nongkren ha ki rynsan elekshon, khamtam u Bah Amazing Kurbah, uba ju ïeng ban kren bad ïalap na ka bynta ka Party UDP. U Bah Samlin ruh u don la ki jong ki nia ha ka jingkren ïalap elekshon jong u, hynrei hadien ka jingkhlad noh u Bah HDR Lyngdoh, ka rukom ïalap jong u ka la kham pher. Ki don ki khep kiba u la shah beiñ ha ki paidbah, namar ka rukom kren jong u kaba kim sngew ïahap, kum ka jingong jong u ba ki don kiba klet noh ban duwai namar ka jingbang palar ka jingtah. Nangta ka jingjer kyrteng jong u ïa ki katto katne ki briew kiba la ngop ha ka dih ka bam namar ka jingkyrsim ha ka lympung saiñpyrthei.
Hadien ka jingthaw ïa ka sorkar MDA- 2, kiba bun ki pyrkhat ba ka jingïakop bad ka jingïabeiñ ïakhoh katto ka la kut, namar ba ka NPP, ka UDP, ka HSPDP, ka BJP kiba don kyrtong ha Sohïong ki la kham thanda, namar ba ki la ïatrei lang biang sa shisien kumba long naduh u 2018 haduh 2023. Hynrei kam shym la long kumta pynban ka jingïabeiñ ka la nang jur nang jur bad poi ruh sha ka jingïabeiñ shimet. Lah ban kdew hangne ba dei ha ka jingïalap elekshon ha Sohïong ba u Bah Prestone Tynsong, u la pynmih ïa ki kyntien ban pynshong ha ka tnum Bos ïa kiwei pat ki Party.
Kawei pat ka mat na ka elekshon ha Sohïong, wat lada kadei tang ha kawei ka Constituency, hynrei kadei ka elekshon kaba lah ban pynkhih ïa kane ka sorkar. Ym tip ha kano ka rukom ban khih, hynrei ka por ba ki arngut ki MLA ka PDF ki la pynpaw ba kin pynïasoh nih sha ka Seng NPP ka long ka dak ba hadien kane ka elekshon ka lah ban don shisha ka jingkhih ha ka sorkar ne ha ka kynhun Myntri.
