Shillong, Nohprah 05 : Ki nongmareh marathon na Meghalaya ki la wan shakhmat ha ka jingmareh kaba 52 kilometer ha Kaziranga ha Assam kaba la long ha ka 03 tarik Nohprah.
Ïa kane ka jingmareh lane ka Ultra Run la pynlong kum shi bynta ban ïalap bad pynsngewthuh paidbah halor ka jingdonkam ban ïada ïa ki kyndad bad la ai kyrteng,“Run for the Rhino. Ha kane ka jingmareh, ki la don ki nongïashim bynta na ki 17 tylli ki jylla jong ka Ri bad kumjuh ruh na Ri Japan bad Bangladesh.
Na ka jylla Meghalaya ki la don bun ngut kiba la leit ban ïashim bynta bad ha ka jingmareh kaba 52 kilometer, kiba la wan shakhmat ha ka liang ki kynthei ki kynthup ïa ka Kong Darishisha Ïangjuh kaba la wan ha ka kyrdan nyngkong bad ka Kong Rephica Becky Pde kaba la wan ha ka kyrdan kaba saw.
Na ka liang ki shynrang, u Bah Tlanding Wahlang u la wan ha ka kyrdan banyngkong katba u Bah Ranbokstar Wanniang u la wan ha ka kyrdan kaba saw.
Nalor kine, ki la don ruh ki nong Meghalaya kiba la ïashim bynta ha ka jingmareh kaba 10 kilometer bad ha ka thup kiba 26 kilometer.
Lah ban kdew ba kitei ki nongmareh kynthei bad shynrang kiba la wan shakhmat ha Kaziranga ki dei kiba la ju ïashim bynta ha kiba bun ki jingmareh thong ha kylleng ka Ri. Na ka por sha ka por ki la ju wanrah nam wanrah burom ïa ka jylla.
Ki nongïalehkai kiba ju ïashim bynta ha kiba kum kine ki jingmareh kiba jngai ki hap ban kilan met jan man la ka sngi da kaba mareh da ki phew kilometre. Ka jingtrei shitom jong ki ban poi sha ki kyrdan ba shalor ka dei kaba kiba bun ba lang kim ju kham ïohi. Watla katta ki ïai tur shaphrang ban wanrah nam wanrah burom ïa ka jylla.
