Nongpoh, Nailar 21: Ki nongïalam ka seng Ri Bhoi People Councils’ (RBPC) mynta ka sngi ki la leit syndon ban jurip ia ka Nongpoh town shopping complex, kaba dei hadien ba bun ki paidbah bad ki nongshong dukan ki la ujor bad pynsngew ïa ka jingduna kiba don ha katei ka ïew paidbah.
Ha ka jingleit jurip la ïalam da u President u Bah Jayson Lennox Nongrum bad la synran lang ruh da ki dkhot ka seng bad kumba ki la leit jurip ki la lap shisha ruh halor shibun ki jingduna kiba don hapoh katei ka shopping complex.
Kum ki nongïalam ki la jurip ha kylleng ki jaka bad ki la ioh ruh ban kylli pyrthew na ki nongshong dukan, kiba la pynsgew shibun ki jingduna kiba don hapoh katei ka Shopping Complex.
Haba kren sha ki lad pathai khubor, u President ka RBPC, u Bah Jayson Lenox Nongrum, u la ong ba ka seng ka dap shisha da ka mynsiem jong ka jingsngewkhia, namar ha ka jingleit jurip ym tang kumba la pynpaw jingeh da ki paidbah bad ki jingshisha ki paw ba don shisha shibun ki jingduna hapoh katei ka shopping complex.
U la iathuh ruh ki jingduna kiba hakhmat eh ki kynthup naduh ka jingbym don ka paiñkhna paidbah kaba biang, ka jingbym biang ka um, ka jingbym biang ka bording ilektrik ba ym treikam ka generator, ka jingbret pathar ïa ki jaboh ba la pynsma iwtung bad kaba ktah ruh wat ïa ka koit ka khiah ki paidbah bad ki nongshong dukan.
U la ong ruh wat ki nongshong dukan ki pynpaw ïa ka jingsngewkhia namar wat ki briew kiba ym ithuh dur khmat ki ju wan ban pynlong kum ka jaka dih kyiad bad kaba buh jingma ïa ki kynthei ki khynnah.
Halor kine ki Nongrim ki jingduna ha katei ka shopping complex, u Bah Jayson Lennox Nongrum u la ong ba ka seng shen kan sa leit ban kynduh ïa u Deputy Commissioner ka Ri Bhoi, ban pynpaw ïa baroh kine ki jingduna ba dei ban pynbit pynbiang ha katei ka shopping complex bad na ka liang ka seng ka dawa ruh ba dei ban shim khia mardor ban pynbiang ïa kitei ki jingduna hapoh katei ka shopping complex.
