Da ka khyrdop talasi pynïeng ban lap ïa ki bar Ri kiba rung beh aiñ ha India buh ka HNYF ha Dangar

Mawkyrwat, ‘Nailar 21: Ka Hynñiewtrep National Youths Front (HNYF) Southern Border Area ha ryngkat ka Hynñiewtrep National Youths Front (HNYF) jong ka Dangar Balat Circle da ka jingsngewkitram bad jingkitkhlieh ïa ka khia ka shon jong ka jaitbynriew ka la leit buh da ka khyrdop talasi ha shnong Dangar kum shibynta ban peit pyrman ïa kiba pynlong kum ka jaka rung jaka mih jong ki briew na Ri Bangladesh.
Ïa ka kynhun la lamkhmat da u bah Strongman Wanniang bad u bah Kyllang Thongni ha kaba ki la buh da ka khyrdop talasi ha shnong Dangar da ka jingthmu ban peit pyrman namar kine shnong ha katei ka thaiñ ki long mar bad ka Bangladesh. Ha kajuh ka por ka HNYF ka lah ïoh jingtip ba ki don ki Dalal khaïi briew kiba kum ka seng ïa mynta kam pat kwah ban pynpaw kyrteng hynrei kan sa nang ïai buddien ïa ka ïaid ka ïeng jong ki.
“Ka Jingpyrshang jong ki mynder ban rung ha ka Ri India ba ieit jong ngi ka long kaba shyrkhei”, ong u bah Kyllang Thongni, kumta na ka liang jong ka HNYF kan nym shongkli-kti hynrei kan nang trei ïa la ka kam bad kyntu ruh ïa ki bor synshar syiem ba kin shimkhia ban peit pyrman ïa ka rung ka mih jong ki bym dei khasi ha ki shnong kiba hap ha ki hima bapher bapher kiba don mar khap bad ka Ri Bangladesh.
Shuh shuh ka seng ka buh ka jingkylli ba balei la weng noh ïa ki Infiltration Check Gate kiba don ha Umpung bad Mawsynram. Kumta kum ka lad ban ïeng ïada na ka jingrung jingmih jong ki briew ba nabar jong ka ri, ka HNYF ka la shim ïa ka sien jam ban pynïeng syndon da ka khyrdop talasi ha Dangar.