Par ñiangkhriat ki paidbah ka Ri Bhoi ba pynphriang khubor hamsaia

0

Nongpoh, Naiwieng 02: Hadien ka jingmih ki khubor hamsaia ha ki social media ba la don kita ki kynhun ba shang tuh bad kiba thmu ban khlong ïa u Dohnud bad u khyllai jong ki briew, kane ka khubor ka la pynpar ñiangkhriat ïa kiba bun ki paidbah ha Ri Bhoi ha kaba la kynnoh ba kane ka jingjia ka la dei kaba jia ha ki bynta jong ki shnong ha Ri Bhoi District.
Kumba la pynpaw ha ki social media bad kaba ym lah ban pynthikna haduh mynta, kane ka jingjia ka la jia ha Ri Bhoi ha kaba la kynnoh ba ki don kita ki kynhun bar jylla haduh 6 ngut kiba shang tuh tang ha ka por mynmiet bad ka jingkynnoh ruh ka long ba kitei ki bar jylla ki thmu ruh ban khlong ïa ki Dohnud bad ki Khyllai briew lada ki ioh lad ha ka jingshang tuh jongki ha ka por mynmiet.
Kumba la pynpaw, ha katei ka social media, la don ruh ka jingkam ba ki la don ki Shnong kiba ïa beh ïa kitei ki briew ha kaba kim lap shuh ïa ki bad ka khubor kaba kham sngewtriem kumba la pynpaw ka long ba kitei ki kynhun ki kham phai khmat sha ki khyllung ban khlong ïa u Dohnud bad ki khyllai lada ki ioh lad.
Lyngba katei ka social media la maham ruh ïa ki paidbah bad ki shnong ba ki dei ban phikir ban ïa ap miet ha man la ki shnong ban ïada na kine ki kynhun runar bad kaba pynpar ñiangkhriat ïa ki paidbah ka dei ruh ba ki ai ruh bad kawei ka dur khyllung kaba la pyni ba la shah khlong ïa u dohnur, khyllai bad ki dohjem.
Halor kane ka jingsaphriang ïa kane ka khubor hamsaia, na ka liang u Mawphor u la ioh ruh ban ïa kren bad u Superintendent of Police ka Ri Bhoi, u Giri Prasad bad kumba la pynshai da une u heh pulit ka Ri Bhoi la ong ba ki pulit ki la wad jingtip halor kane ka jingpynphriang ïa ka khubor hamsaia bad kumba long haduh mynta kim shym la lap ba don kum kine ki jingjia ha Ri Bhoi bad ruh la pynshai ba kane ka jingjia kam don satia ha Ri Bhoi ha kaba la kynnoh ba ka dei tang ka jingpynphriang khubor lamlem ha ki Social media.
Shuh shuh, u la ong ruh wat la katta ruh ki Pulit ki dang pynlong ïa ka jingtohkit halor kane ka jingpynsaphriang ïa ka khubor lamler kaba la ktah ïa ka jingmut jingpyrkhat jong ki paidbah bad na ka liang ki pulit kin sa wad bniah ruh ïa kita ki nogpynphriang ïa kane ka khubor lamlem ban leh katkum ki kyndon ka ain ha kaba kane ka wan rah ka jingsheptieng bad ka jingktah ïa ka jingmut jingpyrkhat jong ki paidbah ha Ri Bhoi, u la bynrap.

Leave A Reply

Your email address will not be published.