Shillong, Nailar 26: Sa shisien pat ka Harijan Panchayat Committee (HPC) ha ka sngi Nyngkong ka la shim biang ïa ka sienjam da kaba kyrpad ïa ka sorkar jylla ban pynjlan biang ïa ka por na ka bynta ban ai jubab ha kaba ïadei bad ka Blueprint, ban pynkynriah ïa ki 342 tylli ki longïing ka Them Metor na Them Ïew Mawlong.
Lah ban ong ba kane ka jingkyrpad ka la mih hadien ba ka jingai por ba 15 sngi ka sorkar jylla ïa ka HPC ban ai ïa ka rai kaba khatduh, kan kut noh ha kane ka sngi Nyngkong.
Ha kaba ïadei bad kane katkum ka kyrwoh khubor u Secretary ka HPC u Gurjit Singh ula ong, ba hadien ka jingïalang kaba dang shu dep, na ka liang u Symbud Myntri Rangbah ka jylla ula ai jingmut ïa ka Committee ba kadei ban ai ïa ka jubab hapoh 2 taïew, hynrei ka HPC ka la pynpaw ba ka jingai por ka la lyngkot palat ïa ki namar ba kin hap ban ïasyllok bad ki bor ba halor jong ki Sikh.
“Ngi thmu ban ïasyllok bad u Jathedar jong ka Sri Akal Takht Sahib, ka Shiromani Gurdwara Prabandhak Committee ha Amritsar, ka Delhi Sikh Gurdwara Management Committee bad kiwei kiwei ki nongïalam. Ka jingbtin lynti ka jongki ka long kaba kongsan bha,” ong u Singh ha ka kyrwoh khubor.
Shuh shuh na ka liang jong u ula ong, “Namar ka jingbym ïoh ïa ka por kaba biang, ki nongïalam ka niam Sikh ki la pynpaw ba kin ym ïoh por ban ïasyllok eiei ha kine ki 2 ne 3 taïew ban wan”.
Halor kane la ïathuh ba ka shithi ka la kdew ruh namar kitei ki daw, ka Harijan Panchayat Committee ka kyrpad ba ïa ka jingïalang ban wan halor katei ka mat dei ban pynlong ha ka taïew ba khatduh jong u Nailur. Ka Committee ka khmih ruh ba ha katei ka por, kin lah ban ai ïa ka jingpynsngew ka jongki ka ban long kaba ryntih lang na ka bynta ka imlang sahlang baroh bad kaba long ruh ka jingmyntoi ïa baroh lang hapoh ka jylla baroh kawei.
