Pan jubab ka ïingbishar High Court na ka sorkar bad GHADC halor ka jingpynïakhlad ïa ka Executive bad Judiciary
Shillong, Kyllalyngkot 3 : Ka ïing Bishar High Court jongka jylla ka la bthah ïa ka sorkar jylla bad ka Garo Hills Autonomous District Council (GHADC) ban ai ïa ka kaiphod kaba shai halor ka jingpynïakhlad ïa ki bor synshar Executive bad Judiciary ha katei ka council.
“ Ka kaiphod ha ka dur jongka Affidavit dei ban ai da ka sorkar jylla bad ka GHADC ban pynpaw kaei ka jigpyrshang ba la shim ban pynïakhlad ïa ka Executive bad Judiciary ha GHADC bad ïa kane ka kaiphod dei ban pynpoi ha lane shwa ka 28 tarik Kyllalyngkot 2026.ïa kane ka rai la shim da ka Division Bench ba kynthup ïa u Chief Justice u Soumen Sen bad u Justice H.S Thangkhiew haba bishar ïa ka PIL ba la ujor da u Flaming B Marak ha ka 10 tarik Nohprah 2025.
ïa une u nongujor PIL la mihkhmat ban ïasaid da u Nongiasaid Aiñ u P.T Sangma uba la pynpaw ba ka don ka jingpynkheiñ ïa ka aiñ namar khlem pat pynïakhlad ïa ka Executive bad Judiciary ha ka GHADC.
Kat kum ka jingtip ba ki la ïoh na u Public Information Afficer jongka tnad GAD ka GHADC la pynpaw ba uwei u briew hapoh ka Council u bat ar tylli ki post bad kita ki long kawei na ka bynta ka Executive bad kawei pat jongka Judiciary.
Ka ïing Bishar kaba la shong bishar ka shem ba kane ka dei ka jingbat arkam da ujuh u briew kaba pynkheiñ ïa ka ain 10 bad 11 jongka GHADC (Administration of Justice) Rules 1953 katba thew ba donkam ban pynïakhlad ïa ka Executive bad Judiciary.
Kane ka jingai jingtip ka pynshisha ba kam pat don ka jingpynïakhlad namar ym pat don kano kano ka jingpynbna ne ka notification ruh bad ka long pyrshah ïa ka GHADC (Admistration of Justice) Rules 1953.
Une uba bat ar kam u dei u SRR Marak uba long ha ka juh ka por u Additional Judge jongka GHADC Court naduh ka 30 tarik Nailar 2023 bad udei une u juh u briew uba bat ruh kum u Secretary ka Executive Committee.
Ka ïing bishar ka bthah ba u dei ban pyllait shisyndon ïa katei ka kam kum u Secretary ka Executive Committee. La bthah ruh ban thung pynskhem ïa u tang kum u Additional Judge jongka District Council Court.