Shillong, Iaiong 17 : Ka ïing Bishar High Court jongka jylla mynta ka sngi, ka la bthah ïa ka Sorkar Jylla ban file affidavit ban pyni ïa ki jingpynkhreh ba la shim ban pynduna ïa ka jingdheng kali ha Nongbah Shillong.
“ Ka affidavit ka Jylla ka dei ban kdew ïa ki plan ki ban pyntreikam ha kine ki khyndiat bnai, kito ki ban pyntreikam ha kine ki khyndiat snem ban wan bad ki ban pyntreikam shirta haba buh hakhmat ïa ka jingnang kharoi ki kali shimet bad ki kali ha surok, ka jingkiew ka kam jngohkai bad ka jingdon ki jaka ba lait thylli” ong ka Division Bench ha ka hukum bala pynmih halor ka PIL jong kane ka kam.
Ka la ong ba ha ki bnai bala dep, ka Jylla ka la pynpaw ba bun na ki kmie kpa jong ki Khynnah skul ha Nongbah ki la mynjur ban phah skul ïa ki khun da ki bos skul haba buh kyndon ba ka Sorkar kan shim ïa ka jingbah khlieh ban pynïaid ïa kine ki bos.
“La pynpaw ba kumba 50 haduh 60 tylli ki bos la dep ban thied na ka bynta kane ka kam. Hynrei, ym shym la ïohi pat ba kan don ka jingpyntreikam” ong ka ïing Bishar
Nalor kane, ka ïing Bishar ka la ong ruh ba ki la don ki plan ba shirta bad ba shipor kiba la dep ban pynpaw khamtam ka jingpyntreikam ïa ki jingai jingmut jong ka IIM, Shillong bad da ka Agency nabar ri bla buh da ka Sorkar Jylla na ka bynta kane ka kam.
“Shuh shuh, ym shym la paw ruh ba kan don jingmih eiei nalor ka ropeway ba la plan bad kata ruh, na ka bynta ki kam jngohkai”kala bynrap.
Ka ïing Bishar kala buh ban shong bishar biang ïa kane ka kam ha ka 3 tarik u Jymmang.
