Pan jingshai ka MACC na ka Health Minister bym hun ïa ka jingpynshai ka DHS (MI)

Shillong, Naitung, 05: Ka Meghalaya Awakening Concern Citizens (MACC) ha ka sngi balang ka la pan jingpynshai na ka Myntri ka Koit ka Khiah ka Sorkar Jylla ka Dr. Ampareen Lyngdoh ha kaba ïadei bad ka jingbret jong ka tnat ka Koit ka Khiah ha ka 29 tarik u Jylliew, 2023 da ki lak tylli ki dawai ha jaka theh ñiut ha Marten, Shillong.
Dang shen ka DHS (MI), Shillong ka la pynshai ba ka jingaiti sha ka Shillong Municipal Board (SMB) ban bret noh ïa ki dawai ba la sniew ïa kiba la lum thup ha Central Medical Store, Shillong ka dei namarba kine ki dawai ki dei kiba la sniew namar ka jingbym ïoh ban pyndonkam na ka jingwan lynshop jong ka jingpang Covid-19.
U President jong ka MACC u Bah Banshai Marbaniang ha ka jingïakren bad ki lad pathai khubor, “namarba ngim hun ïa ka jingpynshai jong ka DHS (MI) ngi la wan ban pan jingpynshai na ka Myntri ka Koit ka Khiah ha kano ka rukom la mang pisa ban thied ïa ki dawai. Hynrei ka Myntri ka la ai jubab ba ki dawai ki dei kiba la sniew na ka jingbym ïohlad ban pyndonkam ha ki snem ba ka jylla ka la shah lynshop ha ka jingpang khlam Covid-19.”
“Ngin ïai dawa ban ïoh jingpynshai ïa ka thup kyrteng jong ki dawai ba la bret (sha Marten) namarba ka Drugs and Cosmetic Act, 1940 bad ka Drugs and Cosmetic Rules, 1945 ka ong ba ïa ki dawai kiba la sniew yn hap ban pynphai sha ki kompeni kiba don ïa ki jaka bret bad kin hap ai bujli da kiwei katkum ka Memonrandum of Understanding (MoU) ba la ïasoi da ka Sokar bad ki Kompeni kiba pynpoi ïa ki dawai kiba kumno ngim lah ban tip haduh mynta,” u la ong.
“Ha ka jylla jong ngi ki don tang 8 tylli ki CHC bad 113 tylli ki PHC, 532 ki Sub-Centre. Ngi shem ba ïa ki dawai ba la bret balei ym lah ban pynpoi sha ki CHC, ki PHC bad ki Sub-Centre. Bun ki thaiñ nongkyndong kim don dawai, ki ud ki nam ba kim don doktor,” u la ong.
“Ngi shim ba ka (jingbret ïa ki dawai) ka dei ka jingpynsyrwa kai ïa ka pisa u paidbah. Kata ka dei kaba ngi hap ban pynpaw. Ka myntri ka la ong ba kan sa phah ïa ka kaiphod bad katno ka pisa la mang ban thied ïa ki dawai ngim pat tip,” la bynrap u Bah Marbaniang.
“Ka Myntri ka la pyntip ïa ngi ba ka dang ap ïa ka kaiphod na ka tnat ka Koit ka Khiah bad hapoh shitaiew ynda la ïoh ïa kaiphod kan sa ai kopi lang sha ngi bad ka kaiphod kaba ngi kwah ka dei ban long kaba shai,” u la ong.
U la kam ruh ba ka jingbret ïa ki dawai ha Marten kan buh jingma ïa ki shnong kiba don sharum jong kane ka jaka theh ñiut bad ïa ka shnong Mawiong namarba ka jingsma kaba mih na ki dawai ba laiphew jait kan ktah ïa ka koit ka khiah bad ïa ki nongrep kiba don sharum ka Marten.