Shillong, Lber 25: U Myntri Rangbah ka jylla u Conrad K Sangma ha ka sngi Saitjaiñ u la ïakynduh ïa u Myntri ka tnat Power jong ka Sorkar Pdeng u R. K Singh ban pan jingkyrshan pisa na ka bynta ban pynkhlaiñ ïa ka tnat sam bording jong ka jylla ka Meghalaya Energy Corporation Limited (MeECL).
Ïa u Conrad Sangma la synran lang da u Myntri ka tnat Power ka Sorkar Jylla u Abu Taher Mondal bad ki Ophisar jong ka Meghalaya Energy Corporation Limited (MeECL). “Ha ka jingpyrshang jong ngi ban pynbeit ïa ka jingtreikam jong ka Meghalaya Energy Corporation Limited (MeECL), ïa ka jingïalang la pylong bad ki ophisar jong ka National Thermal Power Corporation (NTPC) ha ryngkat ka jingdonlang jong u Myntri ka tnat Power u Abu Taher Mondal bad ki Ophisar jong ka MeECL,” la ïathuh u Conrad Sangma ha ka rynsan Tweeter ba la pynmih ha ka sngi Saitjaiñ.
“Ka jingïalang ka la long ruh hapdeng ki ophisar jong ka Power Finance Corporation bad ki ophisar jong ka MeECL bad u Myntri ka tnat Power u A T Mondal ha New Delhi ban ïathir ïatai sani ha kaba ïadei bad ka jingpan ram na ka PFC ban pynkhlaiñ bad ban pynjanai ïa ka pla pisa jong ka MeECL bad ïa ki Sub-sidiaries,” la bynrap u Conrad ha ka rynsan Tweeter.
