Pan jamin ka kurim u Bernard ïa la u tnga na ka High Court

Shillong, Nailur 30 : Ka kurim jongu Vice President ka BJP u Bernard Marak uba dei ruh u MDC ka Tura ka la pan jamin ïa la u jong u tnga na ka ïing bishar High Court jongka jylla ban pyllait noh kloi ïa u na phatok.
ïa kane ka jingpan jamin la ai da ka tnga jongu Bernard ka L.K Gracy. Ka ïing bishar ka la shong bishar halor kane tangba kat haduh ba thoh ïa ka khubor kam pat pynmih kano kano ruh ka rai.
Lah ban pynkynmaw ïa u Bernard la kem daki pulit a Hapur District ha Uttar Pradesh ha ka 26 tarik Naitung hadien ba u la phet rieh na Tura namar ka jinglap ki pulit ba u pynïaid ïa ki kam awria ha ka ïing basa jongu ka Rimpu Bagan. Na katei ka ïing basa ki pulit ki la ïoh ruh ban pyllait im san ngut kik hynnah rit bad kem ruh 73 ngut ki briew kynthei bad shynrang.
La ïoh kem ïa u hadien ba ki pulit ki la ai ka jingpyntip sha baroh ki tnad pulit jong ki jylla bad Union Territory bad kumta la ïoh ban kem ïa u na UP katba ki pulit ki dang pynlong ka jingtalasi kali ha surok bah jong katei ka jylla.
Ka iingbishar ka la ai da ka warrant of arrest ba khlem ïoh jamin pyrshah ïa u Marak uba dei ruh u Chairman ba rim ka ANVC (B).
Hadien kane la register case ïa u ha ka kyndon Immoral Trafficking (Prevention) Act 1956 ha Tura Police Station.
Ki pulit ki la kynnoh ba u Bernard u la pynlong ïa katei ka ïing basa jongu kum ka ktem ki kam awria ( Brothel). Katba u Rimpu pat ul a kyntait ïa katei ka jingkynnoh bad kynnoh kylla ba kane ka jingkhynra ïa ka iing jongu ka dei ka jingleh kput jongka sorkar hadien ba ki la ïoh jingtip ba ka BJP ka la nang khlaiñ ha Tura.